پڕۆژەی فریاگوزاریی ئاوی هەولێر تەواو بوو و كارەكانی كۆتایی هات، بەڕێوەبەری گشتیی ئاوی هەرێمی كوردستان دەڵێت، بەتەواوبوونی پڕۆژەكە، هەولێر هەنگاوێكی مەزن بەرەو سەقامگیریی ئاو دەنێت.
ئەمڕۆ یەكشەم 26ـی نیسان، ئاری ئەحمەد بەڕێوەبەری گشتیی ئاو و ئاوەڕۆی هەرێمی كوردستان، لە رێگەی "وشە"وە، موژدەی كۆتاهاتنی كارەكانی وێستگەی سەرەكیی پڕۆژەی فریاگوزاریی خێرای ئاوی هەولێری ڕاگەیاند.
زیاتر گوتی، پڕۆژەكە بە ڕێژەی 100% كارەكانی جێبەجێ كراون، ئەم پڕۆژە ستراتیجییە وەك وەرچەرخانێكی گرنگ لە دابینكردنی ئاوی خاوێن بۆ پایتەخت هەژمار دەكرێت، بڕیارە لە ئایندەیەكی نزیكدا بە تەواوی بكەوێتە خزمەت هاووڵاتییانەوە.
دەشڵێت، كارەكانی پڕۆژەكە گەیشتوونەتە قۆناغی كۆتایی و تا ئێستە 85%ی كۆی گشتیی ئەركەكان بە سەركەوتوویی ئەنجام دراون، ئەم هەنگاوە تەنیا دروستكردنی وێستگەیەكی ئاسایی نییە، بەڵكو كارێكی ژێرخانیی گەورەیە كە بریتییە لە بەستنەوەی هەرسێ وێستگەی فریاگوزاریی ئاو بە تۆڕە سەرەكییەكانی ناو شاری هەولێرەوە، ئەمەش گەرەنتی گەیشتنی ئاو بە ڕێژەیەكی جێگیر بۆ گەڕەكەكان دەكات.
بەڕێوەبەری گشتیی ئاو باسی لەوە كرد، ئەم پڕۆژەیە لە 25ی نیسانی 2026 وەك وادەی كۆتاهاتنی قۆناغەكان ئاماژەی پێ دراوە، كاریگەرییەكی ڕاستەوخۆ و ناڕاستەوخۆی لەسەر ژیانی هەموو دانیشتووانی شارەكە دەبێت، لە ڕێگەی بەستنەوەی هێڵە سەرەكییەكان بە تۆڕەكانی ناو شار، كێشەی كەمئاوی لە زۆر لە ناوچەكان بە یەكجاری چارەسەر دەبێت و دۆخی دابەشكردنی ئاو دەچێتە قۆناغێكی نوێ و پێشكەوتووەوە، ئەمەش دەبێتە هۆی كۆتاهێنان بەو گرفتانەی كە لە ساڵانی ڕابردوو لە وەرزی گەرمادا، ڕووبەڕووی هاووڵاتییان دەبووەوە.
لە هەشتی ئەیلوولی 2024، لەلایەن مەسروور بارزانی سەرۆكی حكوومەتی هەرێمی كوردستان، بەردی بناغەی پڕۆژەی فریاگوزاریی خێرای ئاوی هەولێر دانرا.
پڕۆژەكە بە گوژمەی نزیكەی 480 ملیۆن دۆلار، لە ماوەی كەمتر لە 550 ڕۆژ جێبەجێ كرا، كێشەی كەمئاوی لە شاری هەولێر بە ڕێژەی 100% چارەسەر بوو.
پڕۆژەی فریاگوزاریی خێرای ئاوی هەولێر، لە ڕۆژێكدا 480 هەزار مەتر سێجا ئاو دەپاڵێوێت، بۆ هەر سەعاتێك 20- 21 هەزار مەتر سێجا ئاوی خاوێن بۆ گەڕەكەكانی شاری هەولێر دەنێرێت.
پڕۆژەكە بە چوار هێڵی سەرەكی لە نێوان گەڕەكەكانی نێوان شەقامی 120 مەتری و شەقامی 150 مەتری جێبەجێ دەكرێت؛ كە گەڕەكەكانی نێوان ئەو شەقامانە و دەرەوەی شەقامەكان و هەریەك لە گەڕەكەكانی دارەتوو، بنەسڵاوە، كەسنەزان، پیرزین، شاوێس، بەحركە، عەنكاوە و سێبیران لێی سوودمەند دەبن.
پرۆسەی وەرگرتنی ئاوی پڕۆژەكە لە زێی گەورە دەست پێ دەكات، پاككردنەوە و پاڵاوتنی ئاوەكە و فلتەركردن و كلۆركردنی ئاوەكە، بە ستانداردی ڕێكخراوی تەندروستیی جیهانی (WHO) و عێراقی جێبەجێ دەكرێت.