پشتی کو گەنم و جەهێ جوتیاران گەهشتیە گولێ و دانی دا، کێزا سنکی کو جورەکێ مێش و مورایە بەردایێ و زیانێن زۆر گەهاندنێ، رێڤەبەریا چاندنێ ژی بۆ چارەسەریێ دوڤچونا بابەتی دکەت.
ئەحمەد جەمیل، رێڤەبەرێ گشتی یێ چاندنێ ل پارێزگەها دهوکێ بۆ "وشە" گوت، کێزا سنکی ئێکە ژ جورێن مێش و مورا و سالانە یان چەند سالان جارەکێ بەر دبیتە گەنم و جەهێ جوتیاران ب تایبەتی پشتی کو دکەڤیتە گول و دانی دا.
زێدەتر گوت، وەکو رێڤەبەریا گشتی یا چاندنێ ل پارێزگەهن دهوکێ، ب مەرەما چارەسەرکرنێ، تیمێن رامالینا کێزا سنکی داناینە و سەرەدانا هەموو وان دەڤەرا دکەت کو کێزا سنکی بەربویە گەنم و جەهێ جوتیاران ب مەرەما چارەسەرکرن و نەهێلان و رامالینا سنکی.
ل زەڤین چاندنێ ل سنورێ قەزا ئاکرێ و بەردەڕەش تیمێن رامالینێ دەست ب کارێ خۆ کریە و رێڤەبەرێ گشتی یێ چاندنێ زێدەتر گوت، مەرەم ژ دروستکرنا تیمێن ڕامالینێ دیڤچوونا زەرو زیانێن کێزا سنکی یە ل سەر کێلگەهێن گەنم و جەهی، ئەڤ دوڤچون و سەرەدانە هەموو دەڤەرێن سەر ب پارێزگەها دهۆکێ دهێتەکرن و هەتا 31-5-2026ێ دێ بەردەوام بن، هەر جوتیارێ بزانیت سنکی زیان بو گەنم و جەهێ وان هەیە دشێت تیمێن رامالینێ ل دەڤەرێن خۆ ئاگەهدار بکەن.
ل سنورێ پارێزگەها دهوکێ، زوترین گەنم و جەهـ ل دەشتێن نافکور و شێخان و سلێڤانەیان دهێتە چاندن، سالانە رێژەیەکا زورا گەنمی ژلایێ سایلویان دهێتە وەرگرتن.
ئەڤ سالە بارانێن زور بارینە و کاریگەریێن ئەرێنی و نەرێنی ژی ل سەر گەنم و جەهی کریە.