بڕیارە ناوەڕاستی هەفتەی داهاتوودا تۆم باراك سەردانی عێراق و هەرێمی كوردستان بكات و لەگەڵ سەرۆك بارزانی و نێچیرڤان بارزانی و مەسروور بارزانی و بافڵ تاڵەبانی و مەزڵوم عەبدیش كۆدەبێتەوە.
باراك ڕۆژی دووشەم سەردانی عێراق دەكات و لەگەڵ عەلی زەیدی سەرۆك وەزیرانی عێراق و چەند بەرپرسێكی باڵادا كۆدەبێتەوە، پاشان سەردانی هەرێمی كوردستان دەكات.
لە سەردانەكەیدا باراك لەگەڵ هەریەك لە سەرۆك بارزانی، مەسروور بارزانی، نێچیرڤان بارزانی، بافڵ تاڵەبانی و مەزڵوم عەبدی كۆدەبێتەوە.
باراك داوای هەڵوەشاندنەوە و چەككردنی میلیشیاكان لە سەركردەكانی عێراق دەكات، كە لە مانگی نیساندا هێرشیان كردبووە سەر دیپلۆماتكارانی ئەمەریكی.
باراك هەوڵ دەدات عێراق بەرەو هاوكاری وزە و بازرگانی لەگەڵ توركیا و سووریا ئاراستە بكات، بۆ ئەوەی پشتبەستن بە ئێران كەمبكاتەوە.
ئەلمۆنیتەر ئاماژەی دا، هەرچەندە هێزەكانی سەر بە موقتەدا سەدر و هەندێك گرووپی وەك "عەسائیبی ئەهلی حەق" ئامادەیی خۆیان بۆ رادەستكردنی چەك نیشان داوە، بەڵام چاودێران بە گومانەوە دەڕواننە ئەم هەنگاوە و پێیان وایە رەنگە تەكتیكێكی ئێرانی بێت بۆ كەمكردنەوەی فشارەكان لە كاتی دانوستانە ئەتۆمییەكاندا.
تۆم بەڕاك پێش گەشتەكەی، لەگەڵ هاكان فیدان، وەزیری دەرەوەی توركیا كۆبووەتەوە و هەوڵ دەدات عێراق لەژێر هەژموونی تاران دەربهێنێت، پێش ئەوەی هێزەكانی ئەمەریكا لە مانگی ئەیلوولی داهاتوودا بە تەواوی لە عێراق بكشێنەوە.