بەڕێوەبەری پەروەردەى ناوەندی هەولێر رای گەیاند، كە سیستمی ئیدارەدانی دۆسیەكانی فەرمانگەكەیان بەدیجیتاڵی كردووە، ئەوەیش هۆكارە كە كارئاسانی زیاتر بۆ هاووڵاتییان بكات.
ئەمڕۆ شەموو 27ی حوزەیران، دلێر عەبدوڵا بەڕێوەبەری پەروەردەی ناوەندی، بە "وشە"ی گوت، لە ژێر ڕۆشنایی و ڕاسپاردەكانی مەسروور بارزانی سەرۆكی حكوومەتی هەرێمی كوردستان لە كابینەی نۆیەم، بۆ دیجیتاڵكردن و نوێكردنەوەی سیستمی بەڕێوەبردنی داتا و زانیارییەكانی فەرمانگە حكوومییەكان، بەڕێوەبەرایەتیی پەروەردەی ناوەندی هەولێر هەنگاوێكی گرنگی هەڵگرتووە لە بواری دیجیتاڵكردنی دۆسیەكان.
روونیشی كردەوە كە ئەم پڕۆژەیە ماوەیەكە بە دەستی ناوخۆیی و لە لایەن فەرمانبەرانی دیوانی بەڕێوەبەرایەتیی پەروەردەی ناوەندی هەولێر، لە چوارچێوەی لیژنەیەكی تایبەتەوە دەستی پێ كردووە، كە لە ماوەی جێبەجێكردنی پڕۆژەكەدا هەنگاوە گرنگ و كاریگەرەکان ئەنجام دراون و تا ئێستە زیاتر لە پێنج هەزار و 700 دۆسیەی فەرمانبەران و مامۆستایانی قۆناغی ئامادەیی بە سیستم كراون و زانیارییەكانیان بە شێوەی دیجیتاڵ تۆمار كراون.
هەروەها دووپاتی كردەوە كە بەپێی پلانە دانراوەكان، لە داهاتوویەكی نزیكدا تەواوی دۆسیەی سەرپەرشتیاران، مامۆستایان و فەرمانبەران دیجیتاڵ دەكرێن و هەموو زانیارییەكان بە شێوەیەكی پارێزراو و متمانەپێكراو دەخرێنە ناو سیستەمی E-Parwarda، كە ئەمەش یارمەتیدەری خێراتركردن، ڕێكخستن و پاراستنی زانیارییە فەرمییەكان دەبێت.
دووپاتی كردەوە كە ئەم هەنگاوە بە پاڵپشتی وەزارەتی پەروەردە و بەڕێوەبەرایەتیی گشتیی پەروەردەی هەولێر و هاوكاریی ژمارەیەك لە دەزگا پێوەندیدارەكان دەستی پێ كردووە. هەروەها چاوەڕوان دەكرێت ئەم پڕۆژەیە خزمەتگوزارییەكان بۆ سەرپەرشتیاران، مامۆستایان و فەرمانبەران باشتر و خێراتر بكات.
وشە/ فەیسەڵ محەمەد شێخانی