سەرۆكی هەرێمی كوردستان لەگەڵ باڵوێزی ئیتاڵیا لە عێراق كۆبووەوە، دووپاتی بە پەرەپێدانی زیاتر بە پێوەندییەكانی عێراق و هەرێمی كوردستان لەگەڵ ئیتاڵیا كردەوە.
ئەمڕۆ پێنجشەم نۆی تەمووز، نێچیرڤان بارزانی سەرۆكی هەرێمی كوردستان، پێشوازیی لە نیكۆلۆ فۆنتانا باڵوێزی ئیتاڵیا لە عێراق و شاندێكی یاوەری كرد.
لە كۆبوونەوەیەكدا سەرۆكی هەرێمی كوردستان، سوپاس و پێزانینی بۆ جەنابی سەرۆك كۆمار، حكوومەت و گەلی ئیتاڵیا بۆ پێبەخشینی مەدالیای ڕێزلێنان دووپات كردەوە، ئەم هەنگاوەی وەك نیشانەی دۆستایەتیی ڕاستگۆیانە و پەرەپێدانی زیاتری پێوەندییەكانی هەردوولا نرخاند.
لە كۆبوونەوەكەدا هەردوولا دووپاتیان لە پەرەپێدانی زیاتر بە پێوەندییەكانی عێراق و هەرێمی كوردستان لەگەڵ ئیتاڵیا كردەوە، هەروەها لەبارەی چۆنیەتیی فراوانكردنی هاوكاریی هاوبەش لە بوارە جیاكاندا، بیروڕایان گۆڕییەوە.
دۆخی ناوخۆی هەرێمی كوردستان، سەردانی هەفتەی ڕابردووی نێچیرڤان بارزانی بۆ ئێران و دیدار و كۆبوونەوەكانی لە تاران، لەگەڵ پێشهاتەكانی دۆخی ناوچەكە و چەند پرسێكی جێی بایەخی هاوبەش، تەوەرێكی تری كۆبوونەوەكە بوو كە كونسوڵی گشتیی ئیتاڵیا لە هەرێمی كوردستان ئامادەی بوو.