وەزارەتی ئاوەدانكردنەوە و نیشتەجێكردن رای دەگەیەنێت، كاركردن لە پڕۆژەی ڕێگەی دووسایدی دوكان - چوارقوڕنە بە چڕی بەردەوامە و بڕیارە هەفتەی داهاتوو 11 كیلۆمەتری دیكەی رێگەكە بە رووی شۆفێراندا بكرێتەوە.
ئەمڕۆ پێنجشەم 23ـی تەمووز، وەزارەتی ئاوەدانكردنەوە و نیشتەجێكردنی حكوومەتی هەرێمی كوردستان بڵاوی كردەوە، لە چوارچێوەی قۆناخەكانی دووەم و سێیەمی پڕۆژەی دووسایدی دووكان - چوارقوڕنە، كارەكانی11 كیلۆمەتر لە ڕێگەكە تا ناوچەی "كانی وەتمان" تەواو بووە. لە ئێستەشدا تەنیا بڕگەكانی هێڵكاری و هەندێك كاری وردی تەكنیكی ماون، كە بڕیارە تا هەفتەی داهاتوو كۆتاییان بێت و بە فەرمی بخرێتە خزمەت هاووڵاتییانەوە.
پێشتر دانا عەبدولكەریم، وەزیری ئاوەدانكردنەوە و نیشتەجێكردن لە بەسەركردنەوەیەكی مەیدانیدا بۆ پڕۆژەكە رای گەیاندبوو، هەموو هەوڵێكمان بۆ ئەوەیە پێش وادەی دیاریكراوی خۆی پڕۆژەكە تەواو بكرێت، چونكە یەكێكە لە پڕۆژە ستراتیژییەكانی هەرێمی كوردستان و گرنگییەكی زۆری بۆ كەرتی گواستنەوە هەیە.
زانیاری دەربارەی پڕۆژەكە:
درێژایی گشتی: 36.5 كیلۆمەتر.
تێچووی پڕۆژە: زیاتر لە 243 ملیار دینار.
دۆخی ئێستە: كاركردن لە تەواوی بڕگەكانی تری پڕۆژەكە بە شێوەیەكی چڕ بەردەوامە.
ئەم پڕۆژەیە یەكێكە لە پڕۆژە گرنگەكانی حكوومەتی هەرێمی كوردستان بۆ كەمكردنەوەی جەنجاڵی و رووداوەكانی هاتوچۆ لە نێوان پارێزگای سلێمانی و ئیدارەی راپەڕین.