بڕیارە یاریی نێوان هەردوو هەڵبژاردنی عێراق و ئوردن لە چوارچێوەی پاڵاوتنەكانی كیشوەری ئاسیا بۆ جامی جیهانی 2026 لە 10ی حوزەیرانی ئەمساڵ بێتە سازكردن، عێراق داوای گۆڕینی شوێنی یارییەكەی كرد، بەڵام یەكێتی تۆپی پێی ئاسیا داواكەی رەت كردەوە.
دوای ئەوە هەفتەی رابردوو لە چوارچێوەی گەڕی هەشتەمی كۆمەڵەی دووەمی پاڵاوتنەوەكانی ئاسیا بۆ جامی جیهانیی 2026، عێراق بە ئەنجامی 1-2 بەرانبەر بە هەڵبژاردەی فەلەستین دۆڕاندی، بەهۆی هوتافی ناشیرینی بەشێك لە جەماوەری هەردوو هەڵبژاردەی فەلەستین و ئوردن لە دژی یاریزانانی عێراق، كێشە دروست بوو، شیعە بۆ پەردەپۆشكردنی دۆڕاندنەكە و هاندانی شەقامی عێراق لە دژی ئوردن، ویستیان بابەتەكە بە سیاسی بكەن و ئەو نەوتە ببڕن لە عێراق بە نرخێكی هەرزان بە ئوردنی دەدات.
لە دوای یاریەكە
یەكێتی تۆپی پێی عێراق سكاڵای لای هەردوو یەكێتی تۆپی پێی ئاسیا و نێودەوڵەتی لە دژی ئوردن تۆمار كرد، داوای كرد یاریەكە لە یاریگەی عەمان بگوازرێتەوە و بێ جەماوەر ئەنجام بدرێت، ئەوەش بۆ پاراستنی یاریزانانی عێراق، كەچی یەكێتی تۆپی پێی ئاسیا بڕیاری دا یاریەكە لە شوێن و كاتی خۆی ئەنجام بدرێت.
یەكێتی تۆپی پێی ئاسیا رای گەیاند كە راپۆرتی چاودێر بۆ یارییەكەی عێراق و فەلەستین كە لە یاریگەی عەمان بەڕێوە چوو، باسی بوونی گوێرەشێوێنی و پێشێلكاریی جەماوەری یان تەناهی نەكردووە، بۆیە یاریەكان وەك ئەوەی دانراون بەڕێوە دەچن.