نەزیرە جاف راوێژكاری یاسایی و پارێزەر لە چاوپێكەوتنێكی "وشە"دا تیشك دەخاتە سەر كار و بڕیارە نایاساییەكانی بەغدا لەبارەی مووچەی فەرمانبەرانی هەرێمی كوردستان، باس لەوە دەكات كە ئەوەی بەغدا تەواو نایاساییە و هەموو هەوڵێكی بۆ ئەوەیە دەسەڵاتەكانی حكوومەتی هەرێمی كوردستان لاواز بكات و نەیانهێڵێت.
* سەرەڕای رێككەوتنی هەردوولا بەغدا لە بیانووگرتن بە هەرێم بەردەوامە، بۆچی؟
بەغدا دەزانێت دەسەڵاتی هەیە و دەتوانێت ئەوەی بیەوێ بیكات، بۆیە دەستی داوەتە دژایەتیكردنی هەرێمی كوردستان و كار بۆ ئەوە دەكات بڕیارەكانی بەسەر هەرێمی كوردستان بسەپێنێت و ئەوەی دەیەوێ ئەنجامی بدات، بەو جۆرە تەماشا هەرێمی كوردستان دەكات و دەیەوێ بیخاتە ژێر دەسەڵات و بڕیارەكانی خۆی.
*لە مانگی نیسانی 2023 چەندین رێككەوتن كراوە، یاسای بودجە و رێككەوتنی نەوتیی هەردوو سەرۆك حكوومەت، كەچی بەغدا هێشتا پابەند نابێت، نیازی چییە؟
ئەمە ئەوەیە كە بەغدا دەیەوێت، خوازیارە هیچ دەسەڵاتێكی هەرێمی كوردستان نەهێڵێت و لە سەرەتای وەستانی نەوتەوە تا ئێستا مووچەی فەرمانبەرانی هەرێمی بە بارمتە گرتووە و هیچ دەقێكی یاسایی بۆ ئەو كارە نییە، هەر دوو مانگ جارێك و شتێكی كردووە بە بیانوو، ئامانجەكەشی تەنیا ئەوەیە ستەم لە هەرێم بكات، هەرێم ملكەچی خۆی بكا و قوت و ژیانی خەڵك بۆ مەرامی خۆی بەكار بێنێت.
*بەغدا داوای هەژماری بانكیی فەرمانبەرانی هەرێمی كردووە، ئەمە لە رووی یاساییەوە چۆنە؟
خۆی بەغدا ئامانجێكی هەیە لەوە، ئەویش ئەوەیە مووچە لە دەستی حكوومەتی هەرێمی كوردستان نەهێڵێت و بیخاتە ژێر دەستی خۆی، دەزانێت ئەگەر هەرێم مووچەی لە دەست نەمێنێت، دەسەڵاتیشی نامێنێت و دوای ئەوە كار بۆ شتی تریش دەكات، تا قۆناغ بە قۆناغ بە تەواوی هیچ شتێك لە دەستی حكوومەتی هەرێم نەمێنێت، لەوكاتەی بەغدا ئەوەی لەسەرە لیستی مووچەی بۆ بڕوات و پارە بۆ هەرێم بنێرێت.
*لەكاتێكدا دادگای فیدراڵی هیچ گرفتێكی نەبووە لەگەڵ هەژماری من و دەڵێت بانكەكانیشی كێشەیان نییە، بۆچی وەزارەتی دارایی فیدراڵی هەر بیانوو دەگرێت؟
هەرچەند لە ماوەی رابردوو دادگاكە زۆر بڕیاری دژی هەرێمی كوردستان دەركرد، بەڵام بڕیارێكی لەبارەی بانكەكانی هەژماری من دەركرد كە گرفتیان نییە و لە لایەن بانكی ناوەندیی عێراقەوە مۆڵەتیان وەرگرتووە و كاركردنیان یاساییە، كەچی حكوومەت و وەزارەتی دارایی عێراق دەیانەوێ خۆیان بسەپێنن، ئەمە كورت و پوختی بیانووەكانی بەغدایە بە هەرێمی كوردستان.
*بەپێی بڕیارێكی دادگای فیدراڵیی عێراق دەبێت مووچەخۆرانی هەرێم لەگەڵ فەرمانبەرانی عێراق مووچە وەربگرن، بۆچی جێبەجێ نەكرا؟
ئەگەر بەغدا بڕیارێكیش لە بەرژەوەندیی كورد دەربكات، ئەوە پێوەندیی بە بابەتی یاساییەوە هەیە نەك بەرژەوەندی، خۆ ناتوانن لە یاساكەی خۆیان لابدەن، ئەوەی گرنگە جێبەجێكردنە كە نەیانتوانی پێوەی پابەند بن، بە چەندین جۆر داوای لیستی مووچەی فەرمانبەرانی هەرێمی كوردستانیان كرد، نازانن چ بیانووێك بگرن تا مووچە دوا بخەن و نەیدەن، ئەمە بە تەواوی پێچەوانەی یاسایە و كارێكی نایاساییە و دژی هەموو بەها مرۆڤایەتییەكانە، مەبەست دەستبردن بۆ قووتی خەڵك و بە سیاسیكردنی مووچە، ئەگەر كێشەیەكی سیاسی هەیە بۆچی دەیبەستێتەوە بە مووچەوە.
وشە/ هۆشیار عەلی