بەبۆنەی جەژنی قوربانەوە، حكوومەتی كاتیی سووریا جەژنانە دەداتە سەرجەم فەرمانبەران و خانەنشینانی وڵاتەكەی.
سەرۆكایەتیی سووریا لە مەرسوومێكدا كە واژووی ئەحمەد شەرع سەرۆكی راگوزەری وڵاتەكەی لەسەرە، وەزارەتی دارایی راسپاردووە بە پێدانی جەژنانە بە سەرجەم مووچەخۆرانی وڵاتەكە.
بەگوێرەی مەرسوومەكە، سەرجەم فەرمانبەرانی سەربازی و شارستانی، بڕی 500 هەزار لیرەی سوورییان وەك جەژنانە پێ دەدرێت، خانەنشینانی سەربازی و مەدەنیش 300 هەزار لیرە وەردەگرن.
بڕیارەكە فەرمانبەرانی هەمیشەیی و كاتی و ئەو كرێكارانەش دەگرێتەوە كە بە كرێی رۆژانە كار بۆ حكوومەت دەكەن، هەروەها ئەو جەژنانەیەی دەدرێتە مووچەخۆران، هیچ باج و لێبڕینێك نایگرێتەوە.