ڕێكخراوی خۆراك و كشتوكاڵی سەربە نەتەوە یەكگرتووەكان (FAO) ڕای گەیاند، نزیكەی دوو ملیۆن 500 هەزار دۆنم زەویی كشتوكاڵیی سووریا كە گەنمی لێ چێنراوە، لە ئەنجامی گۆڕان و تێكچوونی كەشوهەواوە، زیانیان پێ گەیشتووە، بەمەش 16 ملیۆن هاووڵاتیی سووری هەڕەشەی خۆراكیان لەسەر دروست دەبێت.
هەیا ئەبو عەساف یاریدەدەری نوێنەری ڕێكخراوی خۆراك و كشتوكاڵی سەربە نەتەوە یەكگرتووەكان (FAO) ڕای گەیاند، سووریا ڕووبەڕووی دۆخێكی سەختی كەشوهەوا بووەتەوە كە لە ماوەی 60 ساڵی ڕابردوودا هاوشێوەی نەبووە، زیانێكی گەورەی بە كشتوكاڵ و ئاژەڵداریی لەو وڵاتە گەیاندووە.
ئەبو عەساف ئاماژەی بەوەش كرد، ئەم بارودۆخە كاریگەریی لەسەر نزیكەی 75%ـی ناوچە كشتوكاڵییەكانی تایبەت بە بەرهەمهێنانی گەنم و دانەوێڵە و لەوەڕگە سروشتییەكان هەبووە.
یاریدەدەری نوێنەری ڕێكخراوی خۆراك و كشتوكاڵی سەربە نەتەوە یەكگرتووەكان باسی لەوەش كرد، زستانی ئەمساڵ لە سووریا زۆر كورت و بێباران بووە، لە ئەنجامدا زیانی بە نزیكەی 95%ـی گەنمی دێمی گەیاندووە، لە كاتێكدا گەنمی ئاودێری تەنیا بە ڕێژەی 30% بۆ 40% لەو وڵاتە بەرهەم دەهێنرێت و پشتی پێ دەبەسترێت.
هەیا ئەبو عەساف گوتوویەتی، ئەم دۆخە وا دەكات بۆشاییەك لە بەرهەمی گەنم و دانەوێڵە بە ڕێژەی 2.5 بۆ 2.7 ملیۆن تۆن لەمساڵ لە سووریا دروست بكات، بەم شێوەیە نزیكەی 16.3 ملیۆن كەس لە سووریا مەترسیی نەبوونی ئاسایشی خۆراكیان كەوتووەتە سەر.
رووبەری زەوییە كشتوكاڵییەكانی سووریا نزیكەی شەش ملیۆن هێكتارە، پێش ساڵی 2011 و دروستبوونی قەیرانی سیاسی و ئابووری لەو وڵاتە، سووریا یەكێك بوو لە وڵاتە دەوڵەمەندەكان بە بەرهەمی كشتوكاڵی.
پێش شەڕی ناوخۆی وڵاتەكە، سووریا یەكێك بوو لە هەرە دەوڵەمەندترین وڵاتەكان بۆ كشتوكاڵ، لە خاكەكەیدا بە درێژایی سەدان كیلۆمەتر خانووی پلاستیكی و زەویی كشتوكاڵیی داچێندراو بە بەروبوومی جیاجیا هەبوون، بەشێكی زۆریش لەو بەرهەمانە هاوردەی هەرێمی كوردستان دەكران.
پێشتر زەویی بەپیت، دەستی كاری كارامە، كەشوهەوای گونجاو هاوكاریی سەرەكیی سووریان لەوەی وڵاتێكی دەوڵەمەند بێت بۆ كشتوكاڵ، بەڵام ئەمساڵ بەهۆی بێبارانییەوە كێشەی رژدی بۆ بواری كشتوكاڵ لەو وڵاتە دروست كردووە.