دیروکا چێکرنا ئەو ئوتێلا ئەڤرۆ ژلایێ مەسرور بارزانی، ل سەرسنکێ هاتیە ڤەکرن دزفریت بۆ سالا 1946ێ، وشە زانیاریێن وێ یێن کەڤنار بەلاڤ دکەت.
ئوتێلا به‌رى ئێكه‌م ئوتێلا گوزارى و مه‌زنترین ئوتێل ل كوردستانێ كو ل سالا 1946 ل ناوچه‌دارییا سه‌رسنكێ یا سه‌ر ب ده‌ڤه‌ردارییا ئامێدیێ هاتیه دروستكرن، به‌لێ ژ ئه‌گه‌رێ خه‌مسارى و ده‌ربازبوونا ده‌مى و بكارئینانا وێ ژلایێ خه‌لكى ڤه، رۆژ بۆ رۆژێ یا ژناڤ دچوو، لسەر راسپاردێن مەسرور بارزانی جاره‌كا دى هاتە نوژه‌كرن و ئەڤرۆ هاتە ڤەکرن.
كوڤان ئێحسان، شاره‌زایێ شینوارى ل پارێزگه‌ها دهۆكێ بۆ "وشه" گۆت، ئوتێلا به‌رى یان ژى ئوتێلا سه‌رسنك یا گوزارى ب مه‌زنترین و ئێكه‌م ئوتێلا گوزارى ل هه‌رێما كوردستانێ دهێته‌دانان، ل سه‌ر شێوه و ستایله‌كێ تایبه‌ت و نیڤده‌وله‌تى ب قه‌باره‌كێ مه‌زن و ب پێنج ستێرى هاتیه چێكرن.
زێده‌تر گۆت" دیرۆكا چێكرنا ئوتێلا سه‌رسنك یا گوزارى دزڤریت بۆ سالا 1946ێ، پشتى پێنج سالێن تێدا كاركرنێ ژلایێ ئه‌ندازیارێن بیانى و نافخۆ ل سالا 1951ێ هاته ڤه‌كرن، دوه‌ختێ خودا پرانیا سه‌ركردێن عیراقى و كوردان ژى ب مه‌ره‌ما بوراندنا ده‌مه‌كێ خوش قه‌ستا ئوتێلا ناڤبرى دكر ژبه‌ركو هه‌موو جوره خزمه‌تگۆزارى تێدا بوون مینا جهێن بێهنڤه‌دان و ڤه‌حه‌ویانێ، بار، مه‌له‌ڤانگه، جهێ نڤستنێ و چه‌ندان خزمه‌تگۆزاریێن دى، ب گرانترین ئوتێل ژى ژ روویێ پاره‌ى دهاته هژمارتن ل عیراق و كوردستان، ل سالا 1970ێ جارەکێ هاتیه نوژه‌كرن، به‌لێ جهێ داخێ یه ل سالا 1988 پشت هه‌وێن ئه‌نفالان ئوتێل هاته پشتگوهـ هاڤێتن، ل سالا 1991ێ پشتى سه‌رهلدانا گه‌لێ كورد دژى رژێما به‌عس ئوتێل بویه جهێ ڤه‌حه‌ویانا وان كه‌سێن ل توركیا و ئیرانێ زڤرین، ل سالا 2007ێ ژى هاته ڤالاكرن داكو بهێته نوژه‌كرن، به‌لێ دیسان ژ ئه‌گه‌رێ شه‌رێ داعش و هاتنا پێلا ئاوارێن شنگال و ده‌ورۆبه‌ران، ئوتێل هاته بكارئینان بۆ ڤه‌حه‌واندنا ئاوارێن ئێزدى یێن شنگالێ، پاشی ئوتێل هاتە ڤالاکرن و دوبارە نوژەنکرن ڤە.
شاره‌زایێ شینوارى ل بارا پێكاته‌یا ئوتێلێ گۆت "ئوتێل ب شێوه و دیزاینه‌كا نیڤده‌وله‌تى ب دوو نهومان هاتیه چێكرن، نهوما ئێكێ دهاته بكارئینان بۆ ڤه‌حه‌واندن و بوراندنا ده‌مى و مه‌له‌ڤانگه‌ه و جورێن بارێ و چه‌ندین كارێن دى، نهوما دوویێ ژى بۆ نڤستنێ، گشتى ئوتێل پێكدهێت ژ 68 ژورا، هه‌موو ژى ب به‌رى و كسلێ هاتیه چێكرن، له‌وا عه‌ره‌با ناڤێ ئوتێلێ ژ ئوتێلا سه‌رسنك یا گوزارى بۆ ئوتێلا به‌رى گوهرى چونكى روویێ وێ ژ به‌رى هاتیه چێكرن"
ئوتێل ب ستایلەکێ تێکەل دناڤبەرا کەڤنار و نوێ ژلایێ کومپانیەکا نافخۆ هاتیە نوژەنکرن و گەشتیار دشێن سەرەدانێ بۆ بکەن.