وەزیری كشتوكاڵ و سەرچاوەكانی ئاوی هەرێمی كوردستان رای گەیاند، پڕۆژەی "گەشەپێدانی ناوچە گوندنشینەكانی هەرێمی كوردستان لە ڕێگەی گەشەپێدانی بەردەوامی زنجیرە بەهای زەیتی زەیتوون – ناسراو بە پڕۆژەی كۆریس" جێبەجێ دەكات.
بێگەرد تاڵەبانی وەزیری كشتوكاڵ و سەرچاوەكانی ئاوی هەرێمی كوردستان بەمیدیای فەرمی پارتی راگەیاند، "پڕۆژەیەكی ستراتیجی بۆ جووتیاران و ناوچە گوندنشینەكانی هەرێمی كوردستان ،بەناوی پڕۆژەی "گەشەپێدانی ناوچە گوندنشینەكانی هەرێمی كوردستان لە ڕێگەی گەشەپێدانی بەردەوامی زنجیرە بەهای زەیتی زەیتوون – ناسراو بە پڕۆژەی كۆریس" جێبەجێ دەكرێت.
بێگەرد تاڵەبانی وەزیری كشتوكاڵ و سەرچاوەكانی ئاوی هەرێمی كوردستان گوتی، "ئەم پڕۆژەیە یەكێكە لە هەوڵەكانی حكوومەتی هەرێمی كوردستان كە بەهۆیەوە پەرە بە گوندەكانی هەموو ناوچەكانی هەرێمی كوردستان دەدرێت، كوالێتیی بەرزتر و بڕی زیاتری زەیتی زەیتوون بەرهەم دەهێنرێت."
هەر لەمبارەیەوە بێگەرد تاڵەبانی ئاشكرای كرد، ئەم پڕۆژەیە بە هاوئاهەنگی لەگەڵ حكوومەتی ئیتاڵیا و پەیمانگەی سیهام بارییە، ئامانجی سەرەكیی حكوومەتی هەرێمی كوردستان لەم پڕۆژەیە، پەرەپێدانی گوندەكان و بەرهەمهێنانی بەرهەمی زەیتوون و زەیتی زەیتوون و بەدیجیتاڵكردنی سەرجەم باخەكان و ڕاهێنانی جووتیارانە، لەسەر چۆنیەتیی پەروەردەكردن و بەرزكردنەوەی ئاستی كوالێتی و ڕێكارەكانی چاندنی بەرهەمی زەیتوون.
ئەم پڕۆژەیە سەرجەم ناوچە گوندنشینەكان دەگرێتەوە، بەتایبەتی ئەو ناوچانەی تایبەتمەندن بە بەرهەمهێنانی زەیتی زەیتوون."