پارێزگەهـا دهۆکێ پێشڤەچوونەکا پیوانەیی ب خۆڤە دیتیە، سەرجەمێ د سالەکێ دا 357 پڕۆژەیێن وەبەرهێنانێ ب کوژمێ شەش ملیار و 388 ملیۆن دۆلارانە هاتینە چێکرن.
د. هەڤال ئاکرەیی، رێڤەبەرێ گشتی یێ وەبەرهێنانێ ل پارێزگەها دهۆکێ بۆ "وشە" گوت، سالا بوری ل سنورێ پارێزگەها دهوکێ زورترین و هژمارا پیوانەیی یا پروژەیێن وەبەرهێنانێ ل پارێزگەها دهوکێ تومارکر، 357 پڕۆژەیێن وەبەرهێنانێ ب کوژمێ شەش ملیار و 388 ملیۆن دۆلارانە هاتینە چێکرن.
زێدەتر گوت، ب رێیا پروژێن سالا بوری یێن وەبەرهێانێ، دەرفەتا کاری بۆ 19 هزار و 339 کەسان دابینکرینە کو هەموو ژی دەرفەتێن کاری یێن راستەوخۆ بوون، بێگومان ئەڤە ئێک ژ ستراتیژی و ئارمانجێن سەرەکی یێن حکومەتا هەرێما کوردستانێ بووی.
ناڤبری دیارکر ژی ژ کوما پروژێن وەبەرهێنانێ یێن ل پارێزگەها دهوکێ هاتینە چێکرن، 343 پڕۆژە ژلایێ وەبەرهێنانا نافخون بون کو دبیتە رێژا پتری 90%ێ و ب کوژمێ پتری پێنج ملیار دولاران و گوتژی، 10 پروژەیێن وەبەرهێانێ یێن بیانی بوون ب کوژمێ 768 ملیۆن دۆلاران و چوار پڕۆژەیێن هەڤبەش یێن ستراتیژی بوون ب کوژمێ 522 ملیۆن دۆلاران، دیسان ب هەڤکاری ل گەل یەکا راکێشانا وەبەرهێنەرێن بیانی ل دەستەیا وەبەرهێنانێ پێنگاڤێن باش ل سەرانسەری هەرێما کوردستانێ هاتینە هاڤێتن.
سەبارەت پروژێن وەبەرهێنانێ یێن سالا 2026ێ، ڕێڤەبەرێ گشتی یێ وەبەرهێنانێ ل پارێزگەها دهۆکێ گوت، دوپات دکەین کو ئەڤ سەرکەفتنە بەرهەمێ سیاسەتا خورتکرنا کەرتی تایبەتە ژلایێ حکومەتا هەرێما کوردستانێ ڤە، بۆ ئەڤ سالە ژی کارەکی باش ب رێڤەیە و دێ ساڵەکا گەشتر بیت و هژمارا پڕۆژەیان پتر بیت، دیسان 85 پڕۆژەیان زەڤی بۆ ژلایێ رێڤەبەریێن پەیوەندیدار هاتینە تەرخانکرن و 18 ژی دقۆناغا ب رێڤەبرنا رێکارێن تەرخانکرنا زەڤیان دانە و 117 پڕۆپۆزەلێن پڕۆژەیان ژی ژلایێ وەبەرهێنەران هاتینە پێشکێشکرن و پەسەندکرن کو ئەڤە هەمی کەرت و سێکتەرێن جودا جودا بخۆڤە دگرن وەکو چاندن، پیشەسازی، بازڕگانی، گەشتیاری و ئاکنجیکرن .... هتد، ئارمانج ئەوە پتر گرنگی ب کەرتێن پیشەسازی و چاندنێ بهێتە دان دا کو ئاساییشا خوارنێ و سەقامگیریا ئابووری ل پارێزگەهـێ پتر بهێتە چەسپاندن.
سالا بوری کێمتر پروژە و ب کوژمێ کێمتر پروژە ل پارێزگەها دهۆکێ هاتبون چێکرن، ئەڤ سالە کەرتێ چاندن و پێشەسازی دێ ئارمانجا سەرەکی یا پێشخستنێ بیت.