ئاژانسی بلومبێرگی ئەمەریكی، ڕاپۆرتێكی كە عێراق ئارەزووی پتەوكردنی هاوبەشایەتی و كاركردن لەگەڵ هەردوو گەورە كۆمپانیای نەوتی زەبەلاحی ئەمەریكی ئیكسن مۆبیل و شیڤرۆن دەكات، وەك هەوڵێك بۆ بەدەستهێنانی پێوەندیی باش لەگەڵ دۆناڵد ترەمپی سەرۆكی ئەمەریكا و نەهێشتنی ئەو گرژییانەی كە ئەمەریكا بەرانبەر عێراق هەیەتی، خۆبەدوورگرتنی لە هەر سزایەك كە لە ئەنجامی ڕوودانی پێكدادانی نێوان ئێران و ئەمەریكا ڕووبەڕووی ببێتەوە.
بلومبێرگ ڕاپۆرتەكەی ئەمڕۆ سێشەم بڵاوی كردووەتەوە و ئاماژەی داوە، هەردوو كۆمپانیا ئەمەریكییەكە هەوڵەكانی خۆیان چڕ كردووەتەوە و دەیانەوێ كارەكانیان لە وڵاتانی ئەندام لە ئۆپێك فرەوان بكەن، ئەمەیش لە كاتێكدایە كە ناوچەكە سەرچاوەی زۆرترین گرژی و ئاڵۆزی جیۆپۆلەتیكە لەسەر ئاستی دنیا، بەڵام سیاسەتەكانی دۆناڵد ترەمپی سەرۆكی ئەمەریكا یارمەتیدەریان دەبێت لە واژووكردنی گرێبەستی زەبەلاح.
ئاماژەی داوە، سەرەڕای ئەوەی ئەمەریكا دەستی بەسەر نەوتی ڤەنزوێلا گرتووە كە خاوەنی زۆرترین یەدەگی نەوتە لە دنیا، بەڵام لەگەڵ ئەوەیشدا چاوی لە گرێبەستە لە عێراق و لیبیا و جەزائیر و ئازەربایجان و كازاخستان، بەگوێرەی ئەو زانیارییانەی سەرچاوە ئاگادارەكان بە ئاژانسەكەیان داوە.
لە مانگی تشرینی یەكەم/ئۆكتۆبەری ڕابردوو، عێراق ڕێككەوتنێكی لەگەڵ ئیكسن مۆبیل واژوو كرد بۆ توێژینەوەكردن لە كێڵگەی نەوتی مەجنوون، هاوكات مانگێك پێش ئەوە كۆمپانیای شیڤرۆن ڕێككەوتنێكی هاوشێوەی لەسەر پڕۆژەی نەوتی ناسرییە لە باشووری عێراق لەگەڵ بەغدا واژوو كرد.
هەردوو كۆمپانیا نەوتییەكە، چاویان لەسەر كێڵگەی نەوتی "ڕۆژئاوای قوڕنە2"یە كە نزیكەی 10% تەواوی نەوتی عێراقی لێ بەرهەم دێت، ئێستە كۆمپانیای لوك ئۆیل بەڕێوەی دەبات و زۆربەی پشكەكانی خۆی پێشتر بە كۆمپانیای كارلایل گرووپ فرۆشتووە. ئاژانسەكە نووسیویەتی، بەشێك لە بژارە سیاسییەكان لە عێراق گەیشتوونەتە ئەو بڕوایەی كە پێویستە وەبەرهێنانی داهاتووی بواری نەوت لەگەڵ ئەو دوو كۆمپانیا زەبەلاحەی ئەمەریكا بێت، بەمشێوەیەیش سەربەخۆیی وڵات بۆ ئەمەریكا دووپاتی لێ دەكرێتەوە و هەژموونی ئێرانیش بەسەر عێراق كەمتر دەبێتەوە، هەروەها دەبێتە هۆی بەدەستهێنانی پێوەندیی باش لەگەڵ ترەمپ، لە پەراوێزی هەرەسی پێوەندییەكانی نێوان تاران و واشنتن.
ئەو ئاژانسە ئەمەریكییە لە زاری بەرپرسانی عێراق گواستوویەتیەوە، ناڕازین لە پەرەپێدانی كێڵگە نەوتییەكان لەلایەن كۆمپانیاكانی ڕووسیا و چین، وا بیر دەكەنەوە كە بوونی ئیكسن مۆبیل و شیڤرۆن یارمەتیی باشبوونی عێراق دەدات، لە كاتێكدا كە بەیەكدادانی داهاتوو لە نێوان ئێران لەگەڵ ئەمەریكا و ئیسرائیل ڕوو دەدات، ئەو بەرپرسانەی عێراق نەیانویست ناویان بڵاو بكرێتەوە بەهۆی هەستیاریی بابەتەكەوە.
چاوەڕوان ناكرێ كە پێشڤەچوونی گەورە بۆ پێكهێنانی حكوومەتی نوێ بهاوێژرێت، لە كاتێكدا پێكهێنانی حكوومەت خۆی دواكەوتووە، هەڵبژاردن لە مانگی تشرینی دووەم/نۆڤێمبەری ساڵی ڕابردوو ئەنجام دراوە، ئەمەیش لە ئەنجامی دانوستاندانەكانی نێوان گرووپە چەكدارەكانی نزیك لە ئێران كە دەیانەوێ بچنە دەسەڵاتە و پۆستەكانیان بەسەر دابەش بكرێت.
ئەو بەرپرسانەی حكوومەتی كاربەڕێكەری عێراق، ئارەزوو و ویستی ڕاستەقینەی خۆیان نەشاردەوە لەوەی كە دەیانەوێ و مەبەستیانە، عێراق هاوبەشی كاركردن و گرێبەستی گەورەتر لەگەڵ هەریەك لە ئیكسن مۆبیل و شیڤرۆنی ئەمەریكی بكات.