پشتی ئالوزی و شەرێ دناڤبەرا ئیران و ئەمریکا و ئیسرائیلێ، پانزینا بازرگانی ل سەرانسەرێ جیهان و عیراق و کوردستانێ ژی یا گران بوی، بەلێ پانزینا حکومی روژانە دگەهیتە پارێزگەهێن کوردستانێ و ب هەمان بهایێ بەرێ دهێتە دابەشکرن داکو چ قەیران دروست نەبن.
کارزان رەئوف، رێڤەبەرێ رێڤەبەریا سوتەمەنی و نەفت و کانزا ل پارێزگەه دهوکێ دیارکر کو روژانە وەکو بەرێ پانزینا حکومی یا سامانێن سروشتی دگەهیتە کوردستان و پارێزگەها دهوکێ و ل سەر چەند پانزینخانێن سنورێ پارێزگەهێ دهێتە دابەشکرن و ب هەمان بهایێ بەرێ کو 750 دینارە بۆ هەر لیترەکێ لسەر شوفێرا دهێتە دابەشکرن.
زێدەتر گوت، هەتا نوکە چ قەیرانێن پانزینێ ل پارێزگەها دهوکێ نینە و ئەو قەرەبالغ و سرا کو ل هندەک پانزینخانان دروست بوی، ژبەر گرانبونا رێژەیەکا کێم یا پانزینا بازرگانیە، شوفێر دشێن روژانە ل چەند پانزینخانان پانزینا حکومی وەربگرن.
بەری نوکە پانزینا نورمال یا بازرگانی ل پانزینخانێن سنورێ پارێزگەها دهوکێ، دناڤبەرا 730 دینار بۆ 850 دینار بۆ هەر لیترەکێ دهاتە فروتن، بەلێ پشتی شەرێ ئەمریکا و ئیسرائیلێ ل گەل ئیرانێ، بهایێ لیترا پانزینا نورمال یا بازرگانی دناڤبەرا 850 دینار بۆ 950 دیناران بلندبویە، ئەڤێ یەکێ تا ئاستەکێ کێم سرا ل پانزینخانێن، پانزینا حکومی دابەش دکەن دروستکریە.
ل سنورێ پارێزگەها دهوکێ پتری 75 پانزینخانە هەنە، روژانە 450 هزار لیترێن پانزینا حکومی ل ژمارەکا وان پانزینخانان دهێتە دابەشکرن داکو چ ئاریشە و قەیران دروست نەبن.