ڕێكخراوی خۆراك و كشتوكاڵی نەتەوە یەكگرتووەكان (FAO) ڕای گەیاند، نرخی خۆراك لە دنیادا لە مانگی نیسانی ڕابردوو بەراورد بە هەمان مانگی ساڵی ڕابردوو، بەڕێژەی ٢٪ بەرز بوونەتەوە، ئەوەش بەرزترین ئاستە كە لە ساڵی ٢٠٢٣ـوە تۆمار كرابێت.
بەگوێرەی ڕاپۆرتەكەی "فاو"، زەیتی ڕووەكی گەورەترین ڕێژەی بەرزبوونەوەی لە نێوان كاڵا خۆراكییەكاندا هەبووە، هۆكاری ئەوەش بۆ بەرزبوونەوەی نرخی نەوتی خاو دەگەڕێتەوە.
هەروەها دابەزینی ئاستی بەرهەمهێنان لە وڵاتانی باشووری ڕۆژهەڵاتی ئاسیا، هۆكارێكی تری پاڵنەری نرخەكان بووە بۆ سەرەوە.
ڕێكخراوەكە ئاماژەی بەوە كردووە، نرخی گەنم بەڕێژەی ٠.٨٪ بەرز بووەتەوە، ئەم گۆڕانكارییەش بەهۆی مەترسییەكانی وشكەساڵی لە ئەمەریكا و ئوسترالیا، لەگەڵ گرانبوونی نرخی پەینە كیمیاییەكانە كە بەهۆی لێكەوتەكانی جەنگەوە هاتووەتە ئاراوە.
لە كۆتایی ڕاپۆرتەكەدا "فاو" هۆشداریی داوە، بەرزبوونەوەی تێچووی پەینە كیمیاییەكان، ڕەنگە جووتیاران ناچار بكات ڕوو لە چاندنی ئەو بەروبوومانە بكەن كە پێویستیان بە پەینی كەمترە، ئەو هەنگاوەش دەبێتە هۆی كەمبوونەوەی خستنەڕووی گەنم لە بازاڕە جیهانییەكان و بەردەوامبوونی فشارەكان لەسەر نرخ و ئاسایشی خۆراك.