لە 20ی ئۆكتۆبەری 2024 هەڵبژاردنی پەرلەمانی كوردستان بەڕێوە چوو، كەچی تا ئێستە حكوومەتی نوێ پێك نەهاتووە، ئەوەش بەهۆی داوای زۆری دەسەڵات و پۆست لە لایەن یەكێتیی نیشتمانیی كوردستانەوە، واتە زیاتر لەوەی لەوەی خەڵك دەنگ و متمانەی پێ داوە.
چاودێر و مامۆستایانی زانكۆ ئاماژە دەكەن كە خەڵكی كوردستان متمانەی بە حزبەكان داوە و ئەو حزبەی دەیەوێ بەشداریی حكوومەت بێت دەبێ رێز لە بڕیاری خەڵك بگرێت و بەقەدەر ئەو متمانەیە داوای بەشداری بكات كە پێی دراوە، نەك پێكهێنانی حكوومەتی نوێ پەك بخات، تەنیا بۆ ئەوەی پۆستی زیاتر بەدەست بێنێت.
لەوبارەوە شنە نەجمەدین مامۆستای زانكۆی سلێمانی، بە "وشە"ی گوت، لەپاش هەڵبژاردن و دەرچوونی ئەنجامەكان، پارتی دیموكراتی كوردستان هەنگاوی بۆ پێكهێنانی كابینەی 10ی حكوومەت ناوە، ئێستەش لە چوارچێوەی دەستپێشخەریی سەرۆك بارزانی، سەردانی شاندی پارتی بۆ لای لایەنەكان و هەوڵەكان بۆ پێكهێنانی حكوومەت چڕ كراونەتەوە، دەبێت هەموو لایەنە سیاسییەكان بڕوایان بە دیموكراسی و دەنگی گەل هەبێت و بەقەدەر ئەو دەنگ و كورسییەی خەڵك متمانەی پێ داون، بەشداری لە حكوومەت بكەن.
زیاتر گوتی، سەرۆك بارزانی لە هەموو بۆنە تایبەتەكاندا دووپاتی لە دروستكردنی كابینەی نوێی حكوومەت كردووەتەوە، بۆیە دەبێت هەموو لایەنەكان هەست بە بەرپرسیارەتی بكەن، چونكە دواكەوتنی پێكهێنانی لەسەر ئاستەكانی ناوخۆیی و دەرەوە زیانی بۆ حكومڕانیی وڵاتەكەمان دەبێت، كاتی پەنجا بە پەنجا كۆتایی هاتووە و دەبێت یەكێتی و هەموو حزبەكان بە سەنگی خۆیان داوای پۆست بكەن، دەبێت بیر لە خزمەتی خەڵك بكەنەوە و نابێت زۆر لەوەی خەڵك متمانەی پێ داوی داوای پۆست و پلە بكەیت، نەك بێت و ببیتە رێگر لەبەردەم پێكهێنانی كابینەی نوێی حكوومەت.
شایەنی باسە لە چەند رۆژی رابردوو شاندی پارتی لەگەڵ كۆمەڵی دادگەری و یەكگرتووی ئیسلامی كۆبووەوە، ئەوەش بە مەبەستی ئامادەكاریی بۆ یەكگرتوویی كورد لە بەغدا و هەنگاونان بۆ پێكهێنانی حكوومەتی نوێ هەرێمی كوردستان.
لای خۆیەوە هۆزان قادر چاودێری سیاسی، بۆ "وشە" ئاماژە دەكات، گرنگە حكوومەتێك پێك بهێنرێت كە بەهێز بێت و لە تەواوی كوردستان دەسەڵاتی هەبێت، سەرۆك بارزانی هەموو جارێك گوتوویەتی، لە كابینەی 10 یەك حكوومەت و یەك هەرێم و یەك هێزی پێشمەرگە و یەك پەرلەمان دەبێت، نابێت حزبەكان هەژموونیان بەسەر دەسەڵاتەكانی حكومڕانی و سەربازی هەبێت، بۆیە بوونی حكوومەتێكی بەهێز ئامانجی سەرۆك بارزانییە و پێویستە هەموو حزبەكان بڕۆنە ژێر چەتری سەرۆك بارزانی و بەقەدەر ئەو متمانەی خەڵك پێی داون لە حكوومەت بەشدار بن و حكوومەتی خەڵكی كوردستان بێت.
زیاتر گوتی، كابینەی نوێ حكوومەت بە سەرۆكایەتیی مەسروور بارزانی حكوومەتی هاووڵاتی دەبێت، چونكە بینیمان كابینەی نۆ چەند خزمەتگوزار بوو، بەناو پرۆسەیەكی دیموكراسیدا رۆیشتین و ئەزموونی دیموكراسیمان لە رۆژهەڵاتی ناوەڕاست هەبوو، ئەوەش پێمان دەڵێت كە دەبێت حزبەكان بەرپرسیارانە مامەڵە بكەن.
شایەنی باسە هەر لە چوارچێوەی هەوڵەكانی پارتی دیموكراتی كوردستان، بڕیارە سبەی شاندی باڵای ئەو حزبە لەگەڵ شاندی باڵای یەكێتیی نیشتمانیی كوردستان كۆ ببێتەوە، لەوكاتەی خەڵكی كوردستان داوای یەكگرتوویی كورد لە بەغدا و پێكهێنانی كابینەی نوێی حكوومەتی هەرێم دەكەن.
هەڵەبجە/ عەزیز هەورامی