سەرەڕای ئەوەی باس لە جۆرێك پێشكەوتن لە گەڕی دووەمی دانوستاندنەكانی ئێران و ئەمەریكا لە جنێڤ دەكرێ، لە ڕێگەی گەیشتنن بە ڕێككەوتن و كۆتایی بە گرژییەكان دەهێنن لە ڕۆژهەڵاتی ناوەڕاست، بەڵام كۆشكی سپی بە لێدوانێك دۆخەكەی گەڕاندەوە خاڵی سەرەتا، كاتێك ڕای گەیاند، كۆمەڵێك هۆكار هەن كە دەتوانرێ وەك بیانوو بۆ وەشاندنی گورز لە ئێران بهێنرێنەوە.
ئەم لێدوانەی كۆشكی سپی
ئەمەریكا لە كاتێكدا بوو، كەمێك بوو كە شاندی ئەمەریكا و ئێران لە كۆبوونەوەیان لە جنێڤی سویسڕا تەواو بووبوون، بەڵام واشنتن باسی لە هۆكار و بیانووەكان دەكرد بۆ هێرشكردنە سەر ئێران، لە تەك ئەمەیشدا ڕاپۆرتی میدیاكانی ئیسرائیل و ئەمەریكا لە هەمان ڕۆژ پشتڕاستی گەیشتنی هێزی زیاتری ئەمەریكایان بۆ ناوچەكە دەكردەوە.
واشنتن تا ئێستە دوو كەشتیی فڕۆكەهەڵگر و سەتان فڕۆكەی جەنگی و 150 فڕۆكەی بارهەڵگری لە ڕۆژهەڵاتی ناوەڕاست كۆ كردووەتەوە، دەستەی پەخشی ئیسرائیلیش بڵاوی كردەوە كە تەلئەبیب لە چەند ڕۆژی داهاتوو ئامادە دەبێ، بۆ هەڵگیرساندنی جەنگ لە دژی ئێران. بەڕوانین لەو زانیارییانەی سەرەوە، پێگەی "ئەكسیۆس"ی ئەمەریكی شەش هۆكاری خستووەتەڕوو، كە دەریدەخەن ئەمەریكا لەم نزیكانە گورزێكی كوشندەی سەربازی لە ئێران دەوەشێنێت، هۆكارەكانیش بریتین لەمانەی خوارەوە:
یەكەم: ناكۆكیی ماوەدرێژ لەسەر بەرنامەی ناوكی، ئەمەریكا و ئێران بەردەوام گفتوگۆی پچڕپچڕ بۆ گەیشتن بە ڕێككەوتنی ئەتۆمی ئەنجام دەدەن، بێ گەیشتن بە ڕێككەوتنێكی كردارەكی كە هەردوولا پێی ڕازی بن، بۆ نموونە لە حوزەیران/یۆنیۆی ساڵی ڕابردوو ترەمپ 60 ڕۆژ مۆڵەتی بە تاران دا تا لەگەڵ ئەمەریكا بگات بە ڕێككەوتن لەبارەی بەرنامەی ناوكیەوە، بەڵام ئەمە ڕووی نەدا، بەو هۆیەوە ئەمەریكا و ئیسرائیل 12 ڕۆژ مووشەكبارانی ئێرانیان كرد و دامەزراوە ئەتۆمییەكانیان بۆردمان كرد، بەڵام ئەمجارە دۆخەكە بەمشێوەیە نییە و سەرۆكی ئەمەریكا ویستێكی زۆری هەیە كە ڕژێمی سیاسی لە ئێران بگۆڕێت، بۆیە هەڵمەتی سەربازیی ئەمجارە تەنیا دامەزراوە ئەتۆمییەكان بە ئامانج ناگرێت.
دووەم: خۆپێشاندانەكان، ترەمپ لە سەروبەندی بڕیاردا بوو بۆ وەشاندنی گورزی سەربازی لە ئێران لە مانگی ڕابردوو، لە پەراوێزی كوشتنی هەزاران هاووڵاتی خۆپێشاندەر لەلایەن ڕژێمی ئیسلامیی ئێرانەوە، بەڵام كەمێك پاشەكشەی كرد، چونكە ئەمەریكا ئەو هێزە زۆرەی لە ناوچەكە نەبوو تا پەلاماری ئێران بدات، ئێستەیش كە ئێران بە گفتوگۆكردن سەرقاڵ كراوە، ئەمەریكا لە هەمان كاتدا بەردەوامە لە رەوانەكردنی كەشتیی جەنگی و فڕۆكەی جەنگی بۆ ناوچەكە.
سێیەم: پرەنسیپی چیخۆف، بنەما و پرەنسیپێكی بەناوبانگی رۆماننووس و شانۆكاری ڕووسی ئەنتوان چیخۆف هەیە كە دەڵێ، مرۆڤ نابێ چەكێكی پڕ فیشەك لەسەر شانۆ دابنێت، ئەگەر نیازی ئەوەی نەبێ لە وەرزێكی تر چەكەكە بتەقێنێت. لە پەراوێزی نەبوونی ئاماژەی ڕاستەقینە لە گەیشتن بە ڕێككەوتن، ناكرێ پەشیمانبوونەوە ڕوو بدات، ئەمە لەگەڵ كەسایەتیی ترەمپ یەكناگرێتەوە، بەشێوەیەكی گشتیش كەشتییە فڕۆكەهەڵگر و سەتان فڕۆكە لەلایەن ئەمەریكاوە نانێردرێنە شوێنێك، ئەگەر نیازی بەكارهێنانی ئەو هێزە زۆرە و كەشتییانەیان نەبێت.
چوارەم: پاڵەپەستۆ لەلایەن ئیسرائیلەوە، لە چەند ڕۆژێكی تر حكوومەتی ئیسرائیل ئامادە دەبێ بۆ هێرشكردنە سەر ئێران، داوایش دەكات كە ئۆپراسیۆنێكی زۆر ورد و چڕ لە ڕێگەی بۆردمانی زۆرەوە بكرێتە سەر ئێران، تەنانەت لە كاتی گفتوگۆی نێوان ئێران و ئەمەریكایش، ترەمپ و نەتانیاهۆ باسیان لە سەپاندنی سزای ئابووری بەسەر كەرتی نەوتی ئێران دەكرد، بۆیە ئیسرائیل پاڵەپەستۆی لەسەر ئەمەریكا بەردەوامە، تا لە كاتی هێرش ئەو شوێنانەیش بۆردمان بكرێن كە یارمەتیدەری سەرەكی دەبن لە لەناوچوونی ڕژێمی ئیسلامی ئێران، جیا لە لەناوبردنی توانای مووشەكی و بەرنامە ناوكییەكەی.
پێنجەم: هەستكردن بە لاوازیی ڕژێمی ئێران، هۆكارێكی تر هەیە كە وایكردووە ترەمپ بگاتە ئەو باوەڕەی ئێستە كاتی هێرشە، ئەویش لاوازیی زۆری ڕژێمی ئیسلامیی ئێرانە دوای خۆپێشاندانەكان و بۆردمانەكانی ئەمەریكا و ئیسرائیل لە ساڵی ڕابردوو، هەردوولا تەلئەبیب و واشنتن لەو بڕوایەدان كە تاران لە جەنگ ئەگەر وەڵامیش بداتەوە، وەڵامەكانی زۆر سنووردار دەبن، بە پێچەوانەوە ئەگەر چەند مانگ و ساڵێك لێی گەڕێن، ئەوا دووبارە تاران بەهێز دەبێتەوە، چونكە لە دوو ساڵی ڕابردوو باڵەكانی ئێرانیش لە ناوچەكە واتە میلیشیاكانی بەردەوام لە لاوازبوون و كزبووندان.
شەشەم: نەوت، جاران بەهۆی كەمبوونی نەوت لە بازاڕی جیهانی، ئەمەریكا نەیدەوێرا پەلاماری ئێران بدات، بەڵام ئێستە دەرفەتێكی ستراتیجی هاتووەتە بەردەم ترەمپ، بازاڕی نەوت و یەدەگی نەوت لە دنیا زۆرە و نرخی نەوت لاوازە و گەشەی بازاڕەكەیش زۆر ڕوون و لەسەرخۆیە، هەرچەند چاوەڕوان دەكرێ نرخی نەوت زۆر بەرز ببێتەوە لە ئەگەری هەڵگیرسانی شەڕ لە دژی ئێران، بەڵام بەرزبوونەوەی نرخ سنووردار دەبێت، لە ڕووی ڕێژە و ماوەوە، تەنانەت ئەگەر هەناردەی نەوتی ئێرانیش بوەستێت، كاریگەرییەكەی بەوشێوەیە مەترسیدار نابێت.