جینێفەر كاڤانا پسپۆری ئەمەریكی دەڵێ، ستراتیجی سەرۆك دۆناڵد ترەمپ بە سەپاندنی گەمارۆ بەسەر ئێران ئامانجەكانی بەدی ناهێنێت، لەبەرئەوەی گەمارۆكە پەستانی ئابووری لەسەر ئێران دروست دەكات، ئەمەیش ئامرازێكی سەبرە و كاریگەریی كەمە، نابێتە هۆی ئەوەی كاردانەوە و لێكەوتی سیاسیی خێرا بە دوای خۆیدا بهێنێت، وەك ئەوەی حكوومەتی ئەمەریكا چاوەڕوانی دەكرد.
كاڤانا كە بەڕێوەبەری شرۆڤەی سەربازی لە دامەزراوەی "پێشینەی بەرگری"یە، لە بابەتێكی لە ڕۆژنامەی
نیویۆرك تایمز بڵاو كراوەتەوە دەڵێ، بڕیاری ترەمپ بە سەپاندنی گەمارۆ شێوازێكی دووبارەی سیاسەتی سەربازی ئەمەریكایە كە گەمارۆ وەك باشترین ئامراز بەكار دەهێنرێت، وەك چۆن پێشتر دژی ڤەنزوێلا و كوبا گیرایەبەر.
لە حاڵەتی ئێران، ئامانجی ئیدارەی ئەمەریكا ئەوەیە كە ئابووری ئێران بخنكێنێت و تاران ناچار بكات دووبارە هورمز بكاتەوە و بە مەرجەكانی واشنتن ڕازی ببێت، بەڵام ئەم ستراتیجیە بە دەست كێشەیەكی گەورە دەناڵێنێت، ئەو بۆشایی گەورەی نێوان پێشبینییەكان و واقیعە.
جیاوازی لە سروشتی گرەوەكان لە نێوان هەردوولا هۆكارێكی یەكلاكەرەوەیە، جەنگ بەلای ئێران پرسی بوون و نەمانە، ئەمە وا دەكات بەرگەری قورسترین تاڵاوی بۆ ماوەیەكی درێژیش بگرێت، بەڵام ترەمپ هەنگاو دەنێ بۆ سەركەوتنێكی خێرا و یەكلاكەرەوە، ئەوەیش گەمارۆی دەریایی بۆ سەر ئێران ناتوانێ بەدی بهێنێت.
بە دڵنیاییەوە گەمارۆ كێشە بۆ ئابووری ئێران دروست دەكات، بەڵام ناتوانێ ببێتە گورزێكی كوشندە و خێرا كە ئەمەریكا لە داویەتی و خواستی لەسەرە.
نووسەر بۆچوونەكەی خۆی بە نموونەی مێژوویی دەهێنێتەوە و دەڵێ، لە جەنگی ناوخۆی ئەمەریكا لە 1861 تا 1865 ئەو گەمارۆیەی سەرۆك ئەبراهام لینكۆلن بۆ لاوازكردنی ئابووری باشوور سەپاندی، نەیتوانی بە خێرایی كۆتایی بە جەنگ بهێنێت و چوار ساڵی خایاند، لە جەنگی یەكەمی جیهانی لە 1914 تا 1918، گەمارۆی بەریتانیا بۆ سەر ئەڵمانیا وایكرد كە زۆر بناڵێنن، بەڵام نەبووە هۆی ئەوەی كە ئەڵمانیا دەسبەجێ خۆی ڕادەست بكات.
هاوكات نموونەی سەردەمیش بوونی هەیە، لەوانە گەمارۆی ئەمەریكا بۆ سەر كوبا كە بووە هۆی تەنگژەیەكی مرۆیی، بێ ئەوەی كوبا سازشی سیاسی بۆ ئەمەریكا بكات، هاوكات گەمارۆی سەر ڤەنزوێلا نەیتوانی ببێتە هۆی گۆڕانی ڕژێم، بەڵكو بووە هۆی زیادبوونی ئەگەری پێكدادانی سەربازی.
ئەوەی پێوەستە بە ئێرانەوە نووسەر دەڵێ، تاران توانای خۆڕاگریی بۆ ماوەیەكی درێژی هەیە، سەرەڕای ئەوەی داهاتی نەوتی بۆ ناگەڕێتەوە، بەڵام دەتوانێ سوود لە داهاتی نەوتی فرۆشراوی پێشووی وەربگرێت و ئەو كەشتییە بارهەڵگرە نەوتییانەی كە دەتوانن گەمارۆكە ببڕن، سەرەڕای ئەوەیش بەرزبوونەوەی نرخی نەوت لە دنیا یارمەتیی ئێران دەدات، كە ئەگەر بڕێكی كەمتریش لە جاران نەوت بفرۆشێت، ئەوا پارەیەكی زۆرتری دەست بكەوێت، هاوكات ئێران توانای ئەمباركردن و ڕێگەی بازرگانی جێگرەوەی زۆرە كە دەتوانێ لەو ڕێگەیانەوە بەرگەی فشار و گەمارۆكە بگرێت.
ئەمەیش لە كاتێكدایە كە تێچووی گەمارۆی ئەمەریكی بۆ سەر ئێران، بۆ واشنتن و وڵاتانی دنیا لەگەڵ بەرزبوونەوەی نرخی نەوت، زۆر زیاتر دەبێ و ئابووری دنیا تووشی تەنگژە دەكات و لە ئەمەریكایش ڕێژەی هەڵئاوسان زۆر بەرز دەبێتەوە، بە پشتبەستن بەو ئاماژانەی لە سەرەوە تیشكیان خرایەسەر، گەمارۆی دەریایی ئەمەریكا دواجار دەرئەنجامی پێچەوانەی لێ دەكەوێتەوە، تێچووی زۆر دەبێ بێ ئەوەی ئامانج بەدەست بهێنێت و دۆخی گرژیی و ئاڵۆزییەكانیش بەم ئاستەی ئێستە دەهێڵێتەوە.
لە كۆتاییدا كاڤانا دەڵێ، ئەوەی ئێستە هەیە كێبەركێ و بەریەككەوتنی ئیرادەی هەردوو وڵاتە، ئێران پێشینە بە سەبر و بەرگەگرتن لە بەرانبەر زیانەكان دەدات، گرتنەبەری ئەم ستراتیجەیش لەلایەن ئێرانەوە زۆر مەترسیدارە و تێچووی ئەمەریكا زۆر زەبەلاحتر دەكات.