سەنا بەرزنجی: پارەم لە كەس وەرنەگرتووە و هەموو كارەكانی ئەلبوومی "بێلانە" خۆم كردم

:: AM:11:34:27/03/2025 ‌
گۆرانیبێژی لاوی كورد سەنا بەرزنجی ئەلبوومێك بە ناوی "بێلانە" بڵاو دەكاتەوە و رای گەیاند، شانازی بەخۆمەوە دەكەم، "منەتی كەسم هەڵنەگرت و سەرجەم تێچووەكەی خۆم دابینم كرد".

سەنا كە ماوەی چەند رۆژێك لە تۆڕە كۆمەڵاتییەكاندا وێنە و ڤیدیۆی بڵاو دەكرایەوە و بەپێی ئەو وێنە و ڤیدیۆیانە بێت، لە توركیا خەریكی كاری ئەلبوومەكەی بووە.

سەنا دەڵێت: بەمزووانە ئەلبوومی "بێلانە" بڵاو دەبێـتەوە و "تەك بە تەكی گۆرانییەكانم بە دڵ و بە گیان دروست كرد".

هاوكات نووسیویەتی، لە رێگەی دروستكردنی ئەم ئەلبوومە گەورە بووم، خۆم بیر دەكەمەوە چ رێگەیەكی سەختم گرتەبەر و تێمپەڕاند.

ئەو گۆرانیبێژە ئەوەشی گوتووە، "بێ هیچ پشتیوانی و پاڵپشتییەك، خۆم هەموو خەرجیی ئەلبووم و كلیپەكانم گرتە ئەستۆ، ئەمەش لەبەرئەوەی منەت و قسەی كەسم لەسەر نەبێت، شانازی بە خۆمەوە دەكەم، بەڕاستی رێگەیەكی قورس بوو".

سەنا بەرزنجی لە دایكبووی ساڵی2001ی رۆژهەڵاتی كوردستانە، سەرەتا بە گوتنەوە و كەڤەركردنی گۆرانیی فۆلكلۆری كوردی دەستی پێ كرد و توانی هەوادارێكی زۆر بۆ خۆی رابكێشێت، یەكەمین ئەلبوومی بەناوی "راز" بڵاو كردەوە.



وشە - سۆران عەزیز