هونەرمەند و نووسەری كورد حەمە هاشم كە لە ماوەی رابردوودا چەندان كتێبی تایبەتی لەباری هونەر و میتۆد و قۆناغە مێژووییەكانی هونەری شێوەكاری بڵاو كردووەتەوە، لەم ماوەیەشدا هەر لەبارەی هونەری شێوەكاری، سێ كتێبی تر بڵاو دەكاتەوە.
لە لێدوانێكی بۆ "وشە" نووسەر و هونەرمەند حەمە هاشم رای گەیاند، كتێبەكان بریتین لە كتێبی (مێژووی هونەر.. مێژووی مرۆڤ) لە 600 لاپەڕە پێكدێت، ناوەڕۆكەكەی بریتییە لە باسكردن و لێكۆڵینەوەی ورد لە قۆناغە مێژووییەكانی سەرهەڵدانی هونەر لەلایەن مرۆڤەوە لە پێش مێژوو، سەردەمی چاخە كۆنەكانی بەردین و بڕۆنز و دواتر قۆناغی سەرهەڵدانی شارستانێتییەكانی مرۆڤایەتی، تا دەگاتە قۆناغی رێنیسانس و رێبازە هونەرییە تایبەتەكان، هەروەها هونەری مۆدێرن و پۆست مۆدێرن و میتا مۆدێرن كە تازەترین تێماكانی هونەری جیهانین.
هەروەها گوتی، كتێبی (پەیكەرسازی مۆدێرن) بریتییە لە باسكردنی سەرەتای سەرهەڵدانی ئازادی لە پەیكەرسازی و بنەماكانی هونەری مۆدێرن لە پەیكەرسازیدا، جیا لەوەی ئەزموونی هەندێك لە هونەرمەندانیشی لە خۆ گرتووە.
حەمە هاشم باسی لەوەیش كرد كە كتێبی (هونەری پۆستمۆدێرنیزم) كتێبی سێیەمە و بریتییە لەو بنەما و سەرەتایانەی كە بناغەی پۆستمۆدێرنە لە هونەردا، كە (ئایدیا) وەك چەمكێكی گرنگ و كاریگەر رێگەكان بۆ هونەرمەند دەستنیشان دەكات، هەروەها گرێدانی ئەم بابەتە بە بنەما فەلسەفییەكانی هونەرەوە بەگشتی.
هونەرمەندی شێوەكار حەمە هاشم بەجیا لەوەی چەندان پێشانگە و ئەزموونی هونەریی هەیە، تا ئێستە 10 كتێبی تایبەتیشی لەسەر هونەری شێوەكاری نووسیوە و بڵاوی كردوونەتەوە.
حەمە هاشم، ساڵی 1973 لە كۆیە لە دایك بووە، مامۆستای بەشی شێوەكارییە لە پەیمانگەی هونەرە جوانەكانی هەولێر، خاوەنی چەندان خەڵاتی نێودەوڵەتییە. كتێبەكانی پێشووی بە ناوەكانی: "هونەری پیرۆز"، "ڤان كۆخ"، "رۆدا و هونەری ئەبستراكت"، "نامەكانی ڤان كۆخ" و "میكلانجلۆ".