رۆمانێكی گرنگی رۆماننووسی دیاری كورد جەبار جەمال غەریب كرایە ئینگلیزی، دەزگای ئاگۆرا ڤیژن كارەكەی كردووە و دەزگای ئامەزۆن چاپی كردووە.
جەبار جەمال غەریب لەبارەی بڵاوبوونەوەی رۆمانی "كەوتنی ئاسمانەكان" بە زمانی ئینگلیزی، لە هەژماری فەرمیی خۆی لە تۆڕی كۆمەڵایەتیی فەیسبووك نووسیویەتی: رۆمانەكە دەزگای ئاگۆرا ڤیژن كردوویەتی بە ئینگلیزی و دەزگای بەناوبانگی ئامەزۆن چاپی كردووە.
ئاماژەی بەوە كردووە، رۆمانەكە بە دوو شێوەی بەرگی رەق و ئاسایی چاپ كراوە، خوێنەرانی ئەوروپا یان ئەمەریكا دەتوانن راستەوخۆ لە ئامەزۆن داوای بكەن.
پرۆسەی وەرگێڕانی ئەدەبیاتی كوردی بۆ زمانەكانی تر، ماوەی چەند ساڵێكە بە چڕی دەستی پێ كردووە، لەناویشیاندا كارەكانی جەبار جەمال غەریب تا ئێستە بۆ چەندان زمان هاتوونەتە وەرگێڕان.
جەبار جەمال غەریب رۆماننووس و چیرۆكنووسێكی بەتوانای كوردە، ساڵی 1961 لە قەڵادزێ لە دایك بووە. خوێندنی سەرەتایی و ناوەندی و دواناوەندی لەو شارە تەواو كردووە، بۆ تەواوكردنی خوێندن چووەتە بەغدا و لە ساڵی 1985 زمان و ئەدەبی ئینگلیزی لە كۆلێژی ئادابی زانكۆی بەغدا وەرگیراوە.
لە سەرەتای هەشتاكان وەك چیرۆكنووس دەستی پێ كردووە و یەكەم چیرۆكی لە (گۆڤاری بەیان) بەناوی پاشەڕاو بڵاو كردووەتەوە، لە چیرۆكە ناسراوەكانی (تەمە پیاو، شكانی زێ، گیانی تاشەكان، پیاوانی مەڕمەڕ)، لەگەڵ چەندان چیرۆكی تر كە دواتر لە بەرگێكدا بە ناوی (نامەكانی ژاكۆن) بڵاو كرانەوە.
لە ساڵانی نەوەتەكان دەستی كردووە بە نووسینی نۆڤلێت و چەندان نۆڤلێتی لە گۆڤارەكاندا بڵاو كردووەتەوە بەتایبەتی لە گۆڤاری ڕامان. لە ناسراوترین نۆڤڵێتەكانی (نامووسی تۆزوبا، ژنانی ئاو) . پاشان ڕووی لە نووسین و بڵاوكردنەوەی ڕۆمان كردووە و هەر لەو ساڵانەشدا ڕۆمانی كوردی خوێنێكی تازەی تێگەڕا.
بەشێك لە ڕۆمانەكانی ئەم نووسەرە:
• چناری شیر
• شێخی دامووس
• دنیا لە پەرتووكێكدا
• پێنجەمین پەرتووك
• لەسەر باران دەنووسم
• نەتەوەی زێرابەكان
• ئەو باڵندە فڕیوانەی كە زبڵن
• نەتەوەی زێرابەكان
• زێبڕا ناوێك بۆ سەر كێلەكەم
• ڕۆمانە كورتەكان
• دەستێك لە بەهەشت
• پەیكەرێك لە تۆزی تەباشیر
جگە لە ڕۆمان و نۆڤلێت و چیرۆك، جەبار جەمال غەریب چەندان لێكۆڵینەوە و شیكردنەوەی لەسەر چیرۆك و شانۆ و ڕۆمانی كوردی و بیانی نووسیوە، كە دواتر دەزگای سەردەم بە پەرتووكێكی سەربەخۆ بڵاوی كردنەوە بەناوی (خوێندنەوەی پەرتووك).
لە بواری ئەدەبی منداڵاندا سێ پەرتووكی بڵاو كردووەتەوە بە ناوەكانی (تۆش من دەناسی، هاتنەخوارەوەی فریشتەكان) . ئەوە جگە لە چەندان لێكۆڵینەوە و بابەتی ڕۆشنبیری و فیكری كە لە گۆڤار و ڕۆژنامەكان بڵاو كراونەتەوە. وەك (ئەفسانەی نیشتەخێبوون، گریان لە مەحموود پاشای بابانەوە تا قالەمەڕە، دەنگ لە قەوانی قیرەوە تا ڕادیۆی نەوا، سندووقی ڕەشی وێنە یان سندووقی ڕەشی نهێنییەكان، كورد و كۆچ و مەنفا (هۆكارەكان و جۆرەكانی كۆچ) ، ڕۆڵی ئاینەكان لە فۆرمەلە بوونی كولتووری كوردیدا (ئیسلام، كریستیان، یەهوودی)، چیرۆكەكانی ناو تەورات.