یەكەمین ڤێستیڤاڵی فیلمی كوردی بیرمینگهام بەرێوەچوو، چوار فیلم پێشكەشكران، سێ فیلمی كورت و فیلمێكی درێژی دوو سەعاتی،. بەرێوەبەری فێستیڤاڵەكەش دەڵێت، بینەرێكی زۆر بۆ سەردانی ڤێستیڤاڵەكە و بینینی فیلمەكان هاتبوون.
هونەرمەند دارۆ عەزیز رێكخەری فێستیڤاڵەكە رای گەیاند، "ئەم فێستیڤاڵە كە لەلایەن ژمارەیەك لە هونەرمەندان، فیلمسازان و چالاكوانی كورد رێكخراوە، ئامانجی سەرەكی بریتییە لە پشتگیری و هاندانی فیلمسازانی كورد، ناساندنی كولتووری كوردی بە جیهان، و دروستكردنی پلاتفۆرمێك بۆ پێوەندی نێوان هونەرمەندان و بینەران."
وەك دارۆ دەڵێ، زۆرینەی بینەرەكان كوردانی كۆچبەر بوون، كۆچبەرانی بەشە جیاوازەكانی كوردستان. لەناو ئامادەبووەكاندا زیاد لە نەوەیەك دەبینران، لە منداڵانی 10 ساڵەوە بیگرە بۆ دایكان و باوكان و باپیرانی بەتەمەن. ژمارەیەكی گەورەش لە خانمان، بەشێكی زۆریان بە جلوبەرگیی كوردییەوە، هاتبوون. بینەر هەندێكجار وای هەستدەكرد لەناو هۆڵی سینەمای یەكێك لە شارەكانی كوردستاندا ئامادەیە.
باسی لەوەش كرد، لە فیلمی یەكەمدا، فیلمی «ژان» كە ٢٥ خولەك دەخایەنێت و لە دەرهێنانی بورهان ئەحمەدی و لەیلا باخپیرە، تێمای سەرەكیی تێمای ئابڕووچوون و خۆشەویستییە. دایك و باوكێك، كچێكی خاوەن پێداویستی تایبەتی تەمەن ١٣ ساڵیان هەیە. ئەم كچە دەستدرێژی سێكسی كراوەتە سەر و سكی پڕبووە. فیلمەكە بەسەرهاتی گەڕانی دایك و باوكەكە بەدوای پزیشك یان مامان، یان هەركەسێكدا دەگێڕێتەوە، كە سكی كچەكەیان لەبارببات. بینەر هەر زوو بۆی دەردەكەوێت تێمای سەرەكیی فیلمەكە تێمای ئابرووچوونە، ئابرووچوون لە كۆمەڵگایەكدا چۆنیەتی رێكخستنی ژیانی سێكسیی بنەمای هەرەسەرەكیی سیستمە ئەخلاقییەكەیەتی. فیلمەكە پڕیەتی لە دیمەنی هێجگار نایاب و كاریگەر. یەكێك لەو دیمەنانە، كە پێموایە یەكێكە لە دیمەنە هەرە جوانەكانی ناو مێژووی سینەما بەگشتیی، ئەو دیمەنەیە تیایدا باوكەكە لەژێر دەسماڵەكدا لەگەڵ كچەكەیدا پاڵكەوتن. كچەكە وێنەی دڵێك لەسەر دەستی باوكی دەكێشێت، باوكەكەش هەمان وێنە لەسەر دەستی كچەكەی دەكێشێت و دەداتە پڕمەی گریان. بۆ من وەك بینەرێك زۆر زەحمەتە هەرگیز ئەو دیمەنە لەبیربكەم. فیلمەكە گیرخواردنی باوك و دایك و منداڵێك بە دەست ئەخلاق ق بەدئەخلاقیی و دڵرەقیی كۆمەڵگاوە بەرجەستەدەكات.
لەبارەی فیلمی دووەم دارۆ دەڵێت،، فیلمێكە بەناوی «مانلی»ەوە كە تەنیا نزیكەی نۆ خولەكێك دەخایەنێت و ئەدیب فەرەیدون دەرهێنەری فیلمەكەیە. تێمای سەرەكیی ئەم فیلمە نیشاندانی وێنەی دونیای ناوەكیی خێزانێكە نەك تەنها خاڵیی لە خۆشەویستیی، بەڵكو لە لانی هەرەكەمی رێز و پەیوەندیی ئینسانییش. فیلمەكە بەسەرهاتی گیرخواردنی كچ و كورێكی گەنج، بەدەست ژیانی هاوسەرگیرییانەوە، دەگێڕێتەوە. رووداوەكانی ناو فیلمەكەش لەرێگای منداڵێكەوە دەگێڕدرێتەوە كە هێشتا لەدایكنەبووە. ئەوەی ئەو منداڵە لەسەر شاشەكە نیشانمانئەدات، ژیانی پێكەوەیی دووكەسە كە هیچ شتێك بەیكەوە نایانبەسێتەوە، ژیانێكی تەواو وەڕسكەر و بێمانا، پڕ لە بیماریی و گرفتی هەمەجۆر. كارەساتەكەش دروستكردن و راكێشانی منداڵێكە لەلایەن ئەو دوو هاوسەرەوە بۆ ناو ئەو جیهانە بیمارە.
"فیلمی سێیەم، فیلمێكە بەناوی «لیمۆ هەمووشتێكی دەزانی»، تێمای فیلمەكە، تا رادەیەكی زۆر بۆ بینەرانی كورد ناسراوە. ژن و مێردێك هەشت منداڵیان بەیەكەوە هەیە كە هەموویان كچن، خواستی هەبوونی كۆڕێك، منداڵی نۆهەمیان پێدروستدەكات. لە دیمەنی یەكەمی فیلمەكەوە تا كۆتاییەكەی بینەر چاوەروانی روودانی كارەساتێك دەكات. فەزای فیلمەكە فەزای چاوەروانیكردنی هاتنی كوڕێكە، بەڵام هەموو ئەوانەی لە فیلەمەكەدا چاوروانی دەكەن، كە هەشت خوشك و داپیرەیەك و باوكێكن، لەناو دڵەراوكێ و ترس و دوودڵیدا گەورەدا دەژین. فیلمەكە لەوەدا سەركەوتوە بینەریش بخاتە ناو هەمان دۆخی دڵەراوكێوە."
لەبارەی فیلمی چوارەم رێكخەری فێستیڤاڵەكە گوتی، كە فیلمێكی درێژی دوو كاتژمێرییە، ناوی «دراوسێكان»ە. فیلمەكە لە دەرهێنانی «مانۆ خەلیل»ە. ئەگەر سێ فیلمی یەكەم لەسەر رووكارە كۆمەڵایەتیی و كولتورییە جیاوازەكانی كوردبوون كاربكەن، ئەم فیلمەیان، بە پلەی یەكەم، تەرخانە،بۆ باسكردنی رووكارە سیاسییەكانی «كوردبوون». ئەم فیلمەی نامۆ خەلیل، بەر لە هەمووشتێك، باس لە ژیانی منداڵێكی كورد دەكات لە سەرەتاكانی هاتنە سەرحوكمی «حافز ئەسەد»ی دیكتاتۆری سوریا و حوكمرانیكردنی بەعسیەكان، بۆ ئەو وڵاتە.
لەكۆتایشدا ئاماژەی بەوە كردووە، سەرجەمی رووداوەكان لەناو گوندێكی كوردیی سەر سنووری نێوان توركیا و سوریا، باكور و رۆژئاوای كوردستاندا، روودەدان. فیلمەكە بەبێ ئەوەی ببێتە نمایشێكی سیاسیی سادەی پروپاگەندەكەر، یان لانیكەم ئەو تۆنە بەسەر گێرانەوە و نیشاندانی رووداەەكاندا زاڵببێت، بەشێوەیەكی باوەڕپێكراو سەرجەمی ئەو ناهەقیی و غەدر و بێماف و بێرێزیكردنانە نیشانئەدات، كە لە سوریا و توركیادا بەرامبەر بە كوردبوون ئەنجامئەدرێن. لەچەند دیمەنێكی زۆر زیرەكانە و كاریگەردا، كێشانی سنوور لە نێوان توركیا و سووریا و جیاكردنەوەی كوردستانی باكور لە رۆژااوا و دابرانی خێزانە كوردییەكان لەیەكتری، دوای كێشانی ئەو سنوورانە ، نیشانئەدات. هاوكات فیلمەكە زۆر بە وردیی دەركەوتە جیاوازەكانی بەعسیزم وەك ئایدیۆلۆژیایەكی ناسیۆنالیسیی پەڕگیر و وەك پراكتیكی وێرانكەر لەناو ژیانی رۆژانەدا، بە تایبەتی بۆ منداڵان، بەرجەستدەكات. ئەمەش وادەكات چۆنیەتی نیشتەجێكردنی منداڵیی لەناو پرۆژەی بەعسیزمدا، تێمایەكی گرنگیی تری ئەم فیلمەبێت.