ژنە رۆژنامەوان و چالاكی كوردی ئێزیدی، خەڵاتی نێودەوڵەتیی "زمانی شین"ی پێ بەخشرا، خەڵاتەكە لە ئاستی ئەڵمانیا و ئەوروپا یەكێك لە گرنگترین خەڵاتەكانە، لە كاتی رێوڕەسمەكەش نزیكی 15 هەزار كەس ئامادە بوون.
لە شاری كۆڵنی ئەڵمانیا و بە ئامادەبوونی زیاتر لە 15 هەزار كەس، خەڵاتی نێودەوڵەتیی "زمانی شین"ی درایە دیوزەن تیكاڵ.
دیوزەن تیكاڵ وەك ژنێكی كورد لە ناوەندەكانی ئەوروپا گەلێك ناسراوە و چالاكییەكانی ئەڵمانەكانی سەرسام كردووە.
ژنێكی كوردی ئێزیدی لە زۆرینەی كۆنفرانس و كۆڕ و كۆبوونەوەكانی دنیادا بەشداریی دەكات و لەناو هەمووشیاندا باسی دۆزی كورد دەكات، ئەویش دیوزەن تیكاڵە.
تیكاڵ چیتر تەنیا وەك ڕۆژنامەنووسێكی سەركەوتوو لە میدیاكانی ئەڵمانیادا نابینرێت، بەڵكو وەك كارەكتەرێكی سیاسی و دیپلۆماسیی كاریگەر دەركەوتووە.
تیكاڵ كە كچە كوردێكی ئێزیدییە، لە دواین هەنگاوەكانیدا توانی ڕۆڵێكی سەرەكی بگێڕێت لە گەیاندنی دەنگی ڕۆژئاوای كوردستان بۆ یەكێك لە گرنگترین سەكۆ سیاسییەكانی دنیا.
نەك هەر ئەوە، لە زۆرینەی كۆنفرانسەكاندا دەبینرێت و هەموو دەرفەتێك بۆ كورد دەقۆزێتەوە، لە میوشن لەپڕ یەخەی گراهامی كەسایەتیی دیاری كۆمارییەكانی ئەمەریكا و دۆستی كوردی گرت و باسی پشتگیریی كوردی لەگەڵدا كرد، ئەویش گوتی، كورد جێنایەڵین.
لە كۆنفرانسی میوشن دیوزەن دەوری زۆر بوو لە گەیاندنی مەزڵووم عەبدی و ئیلهام ئەحمەد و بە بەرپرسانی دنیا. تەنانەت باس لەوە دەكرێت كە ئەو یارمەتیدەر بووە تا ئەوان بانگێشتی كۆنفرانسەكە بكرێن.
تیكاڵ تەنیا لە پشت مێزی كۆنفرانسەكان كار ناكات، بەڵكو بە بوێرییەكەی لەمەیدانیشدا ناسراوە، لە پەراوێزی كۆبوونەوەكانی ئەنجوومەنی ئاسایش، تیكاڵ ڕووبەڕوی ئەحمەد شەرع بووەوە و هەوڵی دا وەك ڕۆژنامەنووسێك و پارێزەرێكی مافی قوربانیانی جەنگ، چەند پرسیارێكی ڕاستەوخۆی ئاراستە بكات، ئەمەش كاردانەوەی زۆری لە میدیا جیهانییەكاندا لێ كەوتەوە.
ئەو ئەندامێكی چالاكی پارتی دیموكرات مەسیحی ئەڵمانیایە (CDU)، كارەكانی تەنیا لە چوارچێوەی میدیادا نەهێشتووەتەوە، ئەو لە ڕێگەی ڕێكخراوەكەیەوە HÁWAR.help، بەردەوام كار لەسەر پرسی جینۆسایدی ئێزیدییەكان و مافی پەنابەران دەكات، شارەزایانی سیاسیی پێیان وایە تیكاڵ توانیویەتی "هێزی نەرم"ی میدیا بەكار بهێنێت بۆ خزمەتكردنی دۆزی نەتەوەیی و مرۆیی لە ئەوروپا.
(Düzen Tekkal) لە ساڵی 1978 لە هانۆڤەری ئەڵمانیا لە خێزانێكی كوردی ئێزیدیی كۆچبەر كە خەڵكی باكوری كوردستان شاری ئامەدن، لە دایك بووە.
دوای هێرشی داعش بۆ سەر شنگال، گەشتی كرد بۆ باشووری كوردستان و عێراق بۆ بە دۆكیۆمێنتكردنی جینۆسایدی ئێزیدییەكان، فیلمەكەی بەناوی "HÁWAR – My Journey to Genocide" كاردانەوەیەكی جیهانیی گەورەی هەبوو.
ڕێكخراوی بەهاناوەچوونی هاواری دامەزراندووە كە هاوكاریی ژنانی ڕزگاربووی دەستی داعش و منداڵانی ناو كەمپەكان دەكات، هەروەها پڕۆژەی (گێرمەن دریم)ی بۆ پەروەردەی دیموكراسی لە ئەڵمانیا دەست پێ كردووە.
دەڵێت: ''پێویستە دەنگی كورد بگاتە دنیا و بتوانین لەگەڵ هەموو كەسێك لە ئەمەریكا، فڕەنسا و ئەڵمانیا گفتوگۆ بكەین. ئەمە بە كارێكی گەلێك گرنگ دەبینم. خەڵك دەبێ لەوە تێبگات كە چی بەسەر كورد دەهێنرێ و چەندە شەهیدمان داوە.''
تیكاڵ لە كاتی وەرگرتنی خەڵاتەكەدا، گوتارێكی پێشكەش كرد و تێیدا دژایەتیی خۆی بۆ دیكتاتۆری و سەركوتكاری، بەتایبەتی لە رۆژهەڵاتی ناوەڕاست دووپات كردەوە و داوای كرد، نابێت لە ئاست كپكردنی دەنگی ئازاددا بێدەنگی هەڵبژێردرێت، گوتی، ئەو خەڵاتە بۆ 50 ملیۆن كورد و ئێزیدییە كە لەم سەردەمەدا قوربانیی گەورە بۆ ئازادی دەدەن.