هه‌ر چه‌نده ئه‌ڤه چه‌ند ساله‌كه تورێن جڤاكى ل هه‌رێما كوردستانێ دهێنه بكارئینان، به‌لێ هێشتا ژی وه‌كو پێدڤى وه‌لاتى و بكارهێنه‌رێن وان فێرنه‌بوینه كو مفا ژێوه‌ربگرن، پشكه‌ك ژ وان ب شێوه‌یه‌كێ خراپ بكاردئینن، له‌وا داخوازكارێ گشتى ژی ده‌ست ب لڤاندنا چه‌ند سكالایان كریه.
پارێزه‌رێ راوێژكار، بهادین ده‌شتانى ل دادگه‌ها دهۆكێ بۆ "وشه" گۆت: (بكارئینانا تورێن جڤاكى ئێكه ژ مافێن وه‌لاتیان ل هه‌موو جیهانێ و كوردستانێ ژی، به‌لێ دڤێت ب شێوه‌ییه‌كێ رێكخستى بهێته بكارئینان ب ره‌نگه‌كێ كو چوو كه‌س ئازادى و داب و نه‌ریت و هێمایێن پیروز و نه‌ته‌وه‌ى و ئاینى و كه‌سایه‌تى نه‌شكێنیت و ب شێوه‌ییه‌كێ باش بهێنه بكارئینان و دویر ژ تێكدانا شیرازا جڤاكى و ره‌فتارێن كرێت و نه شارستانى).
زێده‌تر گۆت: (دبورى دا ژبه‌ر خراپ ب كارئینانا تورێن جڤاكى ژلایێ چه‌ند كه‌سان ڤه ب تایبه‌تى ب رێیا لایڤان، داخوازكارێ گشتى هاتیه سه‌ر خه‌ت و ده‌ست ب لڤاندنا سكالایان كریه دژى وان كه‌سان، هنده‌ك ژ وان هاتیه گرتن، هنده‌ك ژ وان كچ دئینانه دناڤ لایڤان دا و ره‌فتارێن خراپ ب وان ددانه‌كرن، ئانكو دویر ژ ره‌وشتێن كوردایه‌تى و داب و نه‌ریت و قاونونى ره‌فتار ل سه‌ر لایڤێ دكرن، پرانیا وان كه‌سان ب گوره‌ى ماددا 155 ژ قانونا یالا 1979ێ داخوازكارێ گشتى ماف هه‌یه ل سه‌ر تێكدانا بنپێكاریێن جڤاكى و مافێ گشتى سكالا تومار بكه‌ت دژى وان كه‌سان، دیسان هنده‌ك ژی ب گورى ماددا دوو ژ قانونا هژمار شه‌ش یا سالا 2008ێ ره‌فتار ل گه‌ل هێته‌كرن كو ئه‌و ژی قانونا خراپ بكارئینانا تورێن جڤاكى یه‌و سزا ژی حه‌بسه ب ره‌نگه‌كێ ژ 24 ده‌مژمێرا كێمتر نه‌بیت و ژ پێنج سالان ژی پتر نه‌بیت).
پارێزه‌رێ راوێژكار د درێژاهیا ئاخفتنێن خودا دیاركر ژی كو هه‌ر كه‌س ئازاده چه‌وا ره‌فتارێ ل گه‌ل تورێن جڤاكى بكه‌ت هه‌تا وى راده‌یى ئازادیێن گشتى و كه‌سانێن دى تێكنه‌ده‌ت و گۆت ژی: (په‌رله‌مانێ كوردستانێ ده‌مه‌كه كار بۆ په‌سه‌ندكرنا پرۆژه قانونه‌كێ دكه‌ت ل بارا رێكخستن و بكارئینانا تورێن جڤاكى و ئه‌لیكترونى ب گشتى، ئه‌گه‌ر ئه‌ڤ پرۆژه قانونه بهێته په‌سه‌نكرن و ببیته قانون دێ مفایه‌كێ هه‌رى باش هه‌بیت و ئێدى وه‌لاتى ژی نه‌چارن كو پێگریێ ب بكارئنانا تورێن جڤاكى بكه‌ن ب شێوازه‌كێ باش و دویر ژ ره‌فتارێن خراپ و تێكدانا ئازادیێ).
ب گوره‌ى زانیاریان سالانه ل سنورێ پارێزگه‌ها دهۆكێ پترى 15 كه‌س سه‌را بكارئینانا تورێن جڤاى ب ره‌نگه‌كێ نه‌شارستانى دهێنه گرتن، هنده‌ك ژ وان به‌رنیاسێن تورێن جڤاكى نه ب تایبه‌تى تیكتوكێ و سناپى.