ب گورەی گوتنا جڤاكێ ئێزدی، بریارا سەروكێ حكومەتێ سەبارەت وان كەسێن ژ دەستێ داعشێ رزگاربووی بریارەكا گرنگ و ددەما خۆ دا بو و د بەرژەوەندی و خێرا وان دایە.
سعود مستو، رێڤەبەرێ گشتییێ كاروبارێن ئێزدیان، دیاركر كو بڕیارا سەرۆكێ حكومەتا هەرێما كوردستانێ دەلیڤەیەكا گرنگ و مەزن بۆ رزگاربوویان پەیداكر و بۆ "وشە" چوت، رزگاربوو ب بریارا سەروكێ حكومەتێ دێ شێن خەونێن خۆ بكەنە راستی، پاشەرۆژا خۆ مسۆگەرتر بكەن و شیانێن خۆ پێشڤە ببەن.
مستو زێدەتر گوت، ئئاسانكاریێن مەسروور بارزانی، سەرۆكێ حكومەتا هەرێما كوردستانێ بۆ ڤەگەڕیان و بەردەوامیدان ب پرۆسەیا خواندنێ بۆ رزگاربوویێن ژ دەستێن تیرۆرستێن داعشێ، پێنگاڤەكا گرنگە و پشتەڤانییەكا مەزنە، سوپاسیا سەرۆكێ حكومەتێ ژی دكەین بۆ وەرگرتنا رزگاربوویان ل زانكۆ و پەیمانگەهان و ئەڤێ یەكێ جڤاكێ ئێزدی دلخوشكرینە ب تایبەتی رزگاربوو.
رێڤەبەرێ گشتی یێ كاروبارێن ئێزدیان ل وەزارەتا ئەوقاف وكاروبارێن ئاینی دیاركر ژی كو ئەڤ پڕۆژەیێ گرنگ یێ سەرۆكێ حكومەتێ، ڕێخۆشكرنەكە بۆ رزگاربوویان یێن مەرجێن خواندنێ ژێ دگرن كو بكارن بەردەوامییێ ب خواندنا خۆ بدەن و ل زانكۆ و پەیمانگەهێن هەرێما كوردستانێ بهێنە وەرگرتن و گۆت ژی، ب زوترین دەم بریار دێ چیتە دوارێ بجهكرنێ دا و هزاران كەسان ڤەگەرینیت خواندنێ ڤە.
ل سالا 2014ێ پتری شەش هزار كەس دناڤ ئێزدیان دا كەفتنە دەست داعشێ، ب هەول و بزاڤێن حكومەتا هەرێمێ نێزیكێ چوار هزار ژ وان هاتینە رزگاركرن، بزاڤ بۆ رزگاركرنا یێن دی ژی بەردەوامن.