لە عێراق تەنگژەكان تێكهەڵكێشن و قوربانییەكەش زیاتر گەنجانن، ئەوان لە ناو بێكاری و هەژاریدا دەبنە قوربانییەكی ئاسانی تۆڕەكانی تاوانكاری و بە چەندان جۆر سوودیان لێ دەبینن و هەڵیاندەخەڵەتێنن، لەوانە دەبرێنە ناو تۆڕەكانی بازرگانی بە مرۆڤ و مادەی هۆشبەر و وەك بەكرێگیراو بە شداری لە شەڕەكان دەكەن.
بەپێی ئامارێكی وەزارەتی پلاندانانی عێراق بۆ 2025، زیاتر لە 17%ی دانیشتووانی عێراق لە ژێر هێڵی هەژاریدا دەژین، رێژەی بێكاریی گەنجان لە سەرووی 37%یە، جەواد دەهلەكی ئەفسەری خانەنشین دەڵێت، گرنگترین هۆكاری ئەوەی بەسەر گەنجان دێت ناسەقامگیریی ئابووری و كۆمەڵایەتی و بوونی باند و گرووپی نایاساییە، گەنجان هەڵدەخەڵەتێنن و وایان لێ دەكەن بەشێكی لەشیان بفرۆشن، قوربانییەكانیش زیاترینیان منداڵ و رواڵ و گەنجن لەوانەی پێویستیان بە پارە هەیە.
ئێستە
تۆڕی رەشی ئینتەرنێت تەنیا بوارێك نەماوە بۆ ئاڵوگۆڕكردنی زانیاریی قەدەغەكراو، بەڵكو بووەتە بازاڕێك بۆ كڕین و فرۆشتنی ئەندامەكانی لەش و منداڵ و چەك و بكوژانی بەكرێگیراو، پارەدان لەو بازاڕە ئەلیكترۆنییە، دەهلەكی دەڵێت، باندەكان وا لە خەڵك دەگەیەنن كە یارمەتیان دەدەن بۆ كۆچكردن، كەچی ئەوان لە كۆتاییەكەی خۆیان وەك قوربانی دەدۆزنەوە و بەشێكی لەشیان بردراوە.
جیا لەوانە، باند و قەوارەی چەكداریش سوود لەو بازاڕە دەبینن بۆ رێكخستن و راكێشانی گەنجان بۆ ناو گرووپە چەكدارە نایاساییەكان و بردنیان بۆ ناو شەڕ و ململانێكان، دەهلەكی دەڵێت، رێكخراوی ڤاگنەری رووسی گەنجانی عێراق رێك دەخات و دەیانبات بۆ شەڕ، ئەوان بە پارە و سێكس و وەرگرتنی ئیقامە هەڵدەخەڵەتێنێت، ئەوان لە سووریا و لیبیا و ئۆكراینا سوودیان لێ بینراوە.