رەنگە سەرەڕای ئەو پێوەندییە سۆزدارییەی لە نێوان ژن و پیاودا هەیە و پێویستیی هەردوولایان بە یەكتر و كۆبوونەوەیان لە یەك ماڵ، رەخنە لە شێوازی بیركردنەوەی یەكتر بگرن، هەریەكەیان ئەویتر بە كەمتەرخەمی و بڕیاری هەڵە و گرنگیدان بە شتی جیاواز تۆمەتبار بكات، كەچی وەك شارەزایان دەڵێن ئەو بابەتە پێوەندیی بە جیاوازیی بیركردنەوەیان هەیە، بە شێوەیەك هەرچەند سروشت و ئاكاریان لە یەكتر نزیك بێت، بەڵام جیاوازییان هەر هەیە.
بەگشتی
مێشكی پیاو سەرنج دەخاتە سەر یەك بابەت و كار و گرنگیدان، كەچی ئەوەی ژن توانای سەرنجخستنە سەر چەند بابەت و ئەرك و كاری هاوكات هەیە، مێشك و بیركردنەوەی پیاو دوورمەودایە و سەرنج دەخلاە سەر داهاتوو زیاتر لە ئێستە، كەچی ئەوەی ژن بە پێچەوانەوە، مێشكی ژن زیاتر سەرقاڵە و بە بەردەوام سەرنج دەخاتە سەر كار و كاردانەوەكان، هەرچی پیاوە زەحمەتی لە دەربڕینی كاردانەوە و شیكردنەوەی هەستەكانی هەیە، واتە تا بابەتێك نەبێت قسە ناكات.
كاتێك پیاو بە بابەتێك، وەك كۆمپیۆتەر سەرقاڵە و ژن پرسیارێكی ئاراستە دەكات، بێزار دەبێت، چونكە سەرنجدان و بیركردنەوەی دەپچڕێت، كەچی ژن بەو هەڵسوكەوتەی پیاو بێزار دەبێت كە قسەكردن لەسەر یەك بابەت یان یەك خاڵ بچووك دەكاتەوە، ژنان هەوڵ دەدەن زیاترین زانیاری بەدەست بێنن، كەچی پیاو تەنیا گرنگی بەو بابەتانە دەدەن كە دەیانەوێ یان دەبێت بیكەن، ژنان زیاتر قسە دەكەن و بابەت دروست دەكەن، سەنتەری قسەكردنی پیاو ئەوكات چالاك دەبێت كە پێویستی بە چارەسەركردنی كێشەیەك هەیە، دوای ئەوە بێدەنگی پێ باشترە.