بەڕێوەبەرایەتیی ئاسایشی هەولێر گرتنی ئەو تۆمەتبارەی ڕاگەیاند کە شەوی ڕابردوو لە کۆمەڵگەی شاوێس، پیاوێک و ئافرەتێکی کوشت.
ئەمشەو سێشەم 30ی کانوونی یەکەم، بەڕێوەبەرایەتیی ئاسایشی هەولێر لە ڕاگەیەنراوێکدا ئاشکرای کرد، دوای ئەوەی شەوی ڕابردوو لە تاوانێکی کوشتن لە کۆمەڵگەی شاوێس ئاگادار کرانەوە، تیمەکانیان دەستیان بە بەدواداچوون کرد.
ئاسایش ڕوونی کردووەتەوە، بە فەرمانی دادوەری لێکۆڵینەوە، تۆمەتبار (ی. ف. ڕ)یان گرتووە کە لە لێکۆڵینەوە سەرەتاییەکاندا ددانی بە تاوانەکەیدا ناوە.
بەپێی ددانپێدانانەکەی، تۆمەتبارەکە لەسەر "کێشەیەکی کۆنی کۆمەڵایەتی" هەڵساوە بە کوشتنی ئافرەتێک بە ناوی (أ. ف. ڕ) و پیاوێک بە ناوی (و. ا).
لە کۆتایی ڕاگەیەنراوەکەدا هاتووە، ڕێکاری یاسایی بەرانبەر تۆمەتبار گیراوەتە بەر و پەڕاوی لێکۆڵینەوە ئاراستەی دادگا کراوە.