دیندار زێباری ڕێكخەری ڕاسپاردە نێودەوڵەتییەكان ئاماژە بۆ ئەوە دەكات، پڕۆژەی پاڵپشتیی دارایی بۆ ڕزگاربووانی دەستی داعش، لەلایەن مەسروور بارزانی سەرۆك وەزیرانی كوردستان راگەیەنراوە كە تا ئێستە زیاتر لە سێ هەزار و 500 ڕزگاربوو لێی سوودمەند بوون.
لە میانەی بەشداریكردنی بەشێوەی ئۆنلاین لە دانیشتنەكانی خولی 30ی لیژنەی نەتەوە یەكگرتووەكانی تایبەت بە ڕێككەوتننامەی پاراستنی هەموو كەسێك لە بێسەروشوێنكردنی زۆرەملێ، دیندار زێباری رای گەیاند، شەش هەزار و 417 حاڵەتی ڕفاندنی ئێزیدییەكان دۆكیومێنت كراون، حكوومەتی هەرێم بە هەوڵە بەردەوامەكانی توانیویەتی سێ هەزار و 593 كەسیان ئازاد بكات، لە كاتێكدا دوو هەزار و 824 كەس هێشتا بێسەروشوێنن.
روونیشی كردەوە كە پڕۆژەی پاڵپشتیی دارایی بۆ ڕزگاربووانی دەستی داعش، لەلایەن مەسروور بارزانی سەرۆك وەزیرانی كوردستان راگەیەنراوە كە تا ئێستە زیاتر لە سێ هەزار و 500 ڕزگاربوو لێی سوودمەند بوون، 70%ی ئافرەتی ڕزگاربوو توانیویانە دەرفەتی كار یان پڕۆژەی تایبەتی خۆیان دەست پێ بكەن.
لە ڕووی یاسایی و تەناهییەوە ئامارێكی تری خستە ڕوو و گوتی، كۆی ژمارەی كەیسەكانی تیرۆر لە هەرێم تا ئێستە گەیشتووەتە هەزار و 246 كەیس، كە هەزار و 225 كەیسیان پیاو و 21 كەیسیان ژن بوون.