ئاکرێ کو ب پایتەختێ نەورۆزێ دناڤ کوردان ل سەرانسەرێ جیهانێ دهێتە نیاسین، سالانە ب کەرنەڤال و هەلکرنا خەتیرا جوانترین نەورۆز دکەت، ئەڤ سالە ژبەر رەوشا شەرێ دناڤبەرا ئەمریکا و ئیسرائیل ل گەل ئیرانێ، نەورۆزا ئاکرێ ب رەنگێ فەرمی ناهێتەکرن، بەلێ هەلکرنا خەتیرێن ئاگری ژلایێ گروپێن خوبەخش دێ بەردەوام بیت.
ژێدەرەکێ پەیوەندیدار ل دەڤەرا ئاکرێ بۆ "وشە" گوت، دەمێ پتری دوو هەیڤانە بەرهەڤی بۆ گێرانا جوانترین و نایابترین کەرنەڤالێ نەورۆزێ ل ئاکرێ دهێتەکرن و کارێن وێ بەر ب دوماهیێ دچون، بەلێ مخابن شەرێ ئیران و ئەمریکا روویدا، ئەڤ یەک بویە ئەگەر کو کەرنەڤالێ فەرمی یێ نەورۆزا ئاکرێ و ئاهەنگا جەماوەری ب بەرهەڤبونا بەرپرسێن بلند و نونەر و دبلوماسیێن جیهانی بهێتە هەلوەشاندن، پێخەمەت پاراستنا سەر و مالێ وەلاتیان ژ دەرئەنجامێن شەری.
زێدەتر گوت، ئاکرێ دێ ل نەورۆزێ هەر بەردەوام بیت، ژلایێ گروپێن خوبەخش دێ خەتیرێن ئاگری ل کەلها ئاگرێ و کەلەکەڤنێ و گرێ توپا و جهێن دی وەکو سالانە بەردەوام بیت، دیسان دێ ژلایێ کومپانیا سپونسەر ژی ڤە هندەک یاریێن ئاگری هێنە بەرهەڤکرن و بلندکرن ل شەڤا نەورۆزێ ل ئاکرێ، ب کورتی چ رێورسمێن فەرمی نینە، بەلکو گروپێن خوبەخش دێ ب رێورسمێن ئاگرێ نەورۆزێ رابن بۆ هندێ ئاکرێ هەر ب جوانی وەکو پایتەختێ نەورۆزێ بمینیت ڤە.
ل باژێرێ ئاکرێ وەکو نەریتەکێ سالانە، خەتیرێن ئاگرێ نەورۆزێ ب رەنگەکێ جوان و جودا بۆ سەرێ کەلها ئاکرێ و کەلەکەڤنێ و چەند جهێن دی ژلایێ گروپێن خوبەخش هێنە گێران کو هژمارا وان ب گورەی ساڵا کوردی یە، ئەڤ سالا ژی دێ 2026 خەتیر هێنە هەلکرن.
خەلکێ ئاکرێ و کوردستانێ بو دیتنا جوانیا نەورۆرێ دچنە ئاکرێ و ل جهێن بلند سەحا دیمەنێن جوان یێن باژێرێ ئاکرێ و نەورۆزێ دکەن