وەستانی دڵ واتە مردن، چونكە دڵ سەرچاوەی ژیانی مرۆڤە و لە رێگەی خوێنەوە خۆراك و ئۆكسجین بە خانەكانی لەش دەگەیەنێت، بۆیە وەستانی واتە وەستانی ژیان، توێژینەوەیەكی نوێی سویدی تیشك دەخاتە سەر وەستانی كتوپڕی دڵ و مردنی لەناكاوی مرۆڤ، باسی نیشانە و هۆكارەكانی دەكات.
مردنی لەناكاو واتە مردنێكی پێشبینینەكراو بەهۆی وەستانی كتوپڕی دڵی مرۆڤ، زۆر جار بێ هۆكارێكی روون روودەدات، رەنگە بۆماوەیی لە سیستمی كارەبایی دڵەوە بێت دەبێتە هۆی دروستبوونی كێشە لە لێدانی دڵ و وەستانی، چەند نیشانەیەكی هەیە و زانینی وا دەكات مرۆڤ بتوانێت خۆی لێ بپارێزێت.
ساڵانە لە نێوان چوار بۆ پێنج ملیۆن كەس تووشی دەبن، بێ هیچ ئاگەداركردنەوە دڵیان لە لێدان دەكەوێت، توێژەرانی سوید باسی چوار نیشانەی پێشوەختەی ئەو حاڵەتە دەكەن، وەك د. ماتیلدا فریسك توریل لە زانكۆی گۆتنبێرگ ئاماژە دەكات، بەر لە چەند رۆژێك لە حاڵەتەكە دیار دەكەون، ئەوانیش دڵەكوتێ و لەهۆشخۆچوون و هیڵنج و رشانەوەن، بۆیە ئەگەر ئەوانە دەركەوتن پێویستە ئەو كەسە سەردانی نەخۆشخانە بكات.
تیمی توێژینەوەكە شیكردنەوەی بۆ هەزار حاڵەتی مردنی كاتوپڕ بەهۆی كێشەی دڵ لە سوید كرد، تەمەنی ئەوان لە نێوان یەك بۆ 36 ساڵ بوو، دەركەوت 22%یان بەهۆی ئەو حاڵەتە مردوون و 64%یان لە رەگەزی نێرن و 52%یان نیشانەی بوونی كێشەی دڵیان پێشتر هەبووە، چەند جۆرێكی هەیە، بە گشتی هۆكارەكەی بۆماوەیی و بوونی كێشەی زگماكییە لە دڵ كە لە باوانەوە بۆ رۆڵەكانیان دەگوزارێتەوە.