كەس ناتوانێت نكووڵی لە گرنگیی ئاو بۆ لەشی مرۆڤ بكات، شارەزایانی تەندروستی و خۆراك بە بەردەوام دووپات لە گرنگی خواردنەوەی رۆژانە و پێویستی ئاو دەكەنەوە، زۆرێك وا دەزانن كە نەخواردنەوەی ئاو و وشكهەڵگەڕانی لەش تەنیا دەبێتە هۆی سەرئێشە و وشكبوونەوەی پێست، كەچی توێژینەوە زانستییەكان ئاماژە بۆ كاریگەریی لەوە زیاتر دەكەن لەوانە بچووككردنەوەی قەبارەی مێشك و بەجێگەیاندنی فەرمانەكانی.
لە 75%ی مێشكی مرۆڤ لە ئاو پێك هاتووە، ئەوەش وای كردووە بۆ كەمیی ئاو شلەكانەوە زۆر هەستیار بێت، بۆیە ئەگەر مرۆڤ بڕی پێویستی رۆژانەی ئاو نەخواتەوە، چڕیی خوێكان لە خوێنی زیاد دەكات، بۆیە لەش پەنا بۆ راكێشانی ئاو لە خانەكانی مێشك دەبات بۆ پارێزگاریكردن لە هاوسەنگی، ئەوەش وا دەكات ئەوان بە شێوەیەكی كاتی بچنەوە یەك.
توێژینەوەكان دەریان خست كە وشكهەڵگەڕانی كورت بۆ ماوەی 12 بۆ 16 سەعات، قەبارەی مێشك بە رێژەی 0.3 و 0.6% كەم دەكاتەوە، بەر لەوەی مێشك بگەڕێتەوە قەبارەی ئاسایی خۆی لە دوای خواردنەوەی ئاو، ئەگەرچی ئەو چوونەوەیەكەی مێشك كەمە، بەڵام كاریگەری دەكاتە سەر فەرمانەكەی، كاتێك لە توێژینەوەكان دەركەوتووە كە مێشك لە حاڵەتی وشكهەڵگەڕان، ناچار دەبێت ئەركێكی زیاتر بۆ بەجێگەیاندنی هەمان فەرمان بكێشێت، بەتایبەتی پێوەست بە تەركیز و چارەسەركردنی كێشەكان.
جیا لەوە لەدەستدانی 1-2%ی شلەی لەش دەبێتە هۆی لاوازیی وشیاری و سستی كاردانەوە و زیادبوونی شەكەتی و گۆڕانی میزاج، بەتایبەتی لە منداڵ و بەتەمەنداچووەكان، لەسەر ئاستی درێژخایەنیش توێژەران دەڵێن نەخواردنەوەی ئاو و وشكهەڵگەڕان دەبێتە هۆی زیادبوونی مەترسی سەكتەی مێشك بەهۆی زیادبوونی لینجیی خوێن و لاوازیی گەیشتنی بۆ مێشك.