بەپێی قسەی شارەزایانی تەندروستی و خۆراك، قەڵەوی سەرچاوەی هەموو نەخۆشییەكانە، بۆیە پێویستە مرۆڤ بەر لە دەركەوتنی زیان و كاریگەرییەكانی، خۆی لێ بپارێزێت، كەسانێك هەن بنیاتی لەشیان قەڵەوە و ئەوانە دەبێت ئەركی زیاتر بكێشن، بەڵام كەسانێك بەهۆی زۆر خواردن و جۆری خواردن و وەرزشنەكردن و كەمجووڵانەوە تووشی دەبن، ئەوانە پێویستە بە زیانەكانی قەڵەوی بزانن و ژیانیان رێك بخەنەوە.
د. ئیهاب عەتیە پسپۆڕی نەخۆشییەكانی دڵ ئاماژە دەكات كە قەڵەوی هۆكاری هاوبەشە لە نێوان زۆرینەی نەخۆشییەكانی دڵ و لوولەكانی خوێن، رەنگە پزیشك شەكرە و بەرزیی پەستانی خوێن چارەسەر بكات، بەڵام كێشە بنەڕەتییەكە قەڵەویە، كە راستەوخۆ پێوەندیی بە تووشبوون بە تەنگژەی دڵ و سەكتەی مێشك و تەسكبوونەوەی خوێنبەرە تاجییەكان و پەككەوتنی ماسولكەی دڵەوە هەیە.
ئەو پزیشكە دەڵێت، 70%ی مردن لە دنیا پێوەندی بە نەخۆشییەكانی دڵ و لوولەكانی خوێنەوە هەیە، كە قەڵەوی بەرپرسە لە رێژەیەكی زۆری ئەو مردنانە، بۆیە قەڵەوی خاڵی سەرەتا و دەستپێكی تەواوی كێشەكانی دڵە و چارەسەرنەكردنی قەڵەویش بووەتە هۆی زیادبوونی مردن بەو هۆیەوە بۆ سێ هێند، بۆیە چارەسەركردنی قەڵەوی راستەوخۆ دەبێتە هۆی كەمبوونەوەی رێژەی مردن و باشبوونی تەندروستیی دڵ، تەنانەت لای ئەوانەش كە شەكرەیان هەیە.
قەڵەوی بریتییە لە كەڵەكەبوونێكی ناسروشتی یان زۆری چەوری كە مەترسی لەسەر تەندروستی دروست دەكات، قەڵەوی جیا لە كێشەكانی دڵ و لوولەكانی خوێن، هۆكارە بۆ تووشبوون بە چەند حاڵەتێكی تری نەخۆشی وەك جۆری دووەمی شەكرە و شێوانی خەو و هەندێك جۆر شێرپەنجە و هیتریش.