ماوەی هەفتەیەك دەبێ پروپاگەندەی زۆر لەبارەی هونەرمەندی ناوداری عەرەب و میسر "عادل ئیمام" بڵاو بووەتەوە و ئاماژە بەوە دراوە، ئەو هونەرمەندە تووشی نەخۆشیی ئەلزەهایمەر بووە و ئیتر ناتوانێ كاری هونەری پێشكەش بكات. وێڕای وەڵامی خێزانەكەی و رەتكردنەوەی پروپاگەندەكان، ئیمام خۆیشی وەڵامیانی داوەتەوە.
پێگەی "
شەفەق نیوز" ئەمڕۆ یەكشەم 25ی ئەیلوول بڵاوی كردووەتەوە، دوای ئەو هەموو پروپاگەندانەی لەبارەی تووشبوونی عادل ئیمام بە نەخۆشیی ئەلزەهایمەر، لەناو هەفتەی رابردوودا بڵاو بوونەوە، ئیمام خۆیشی هاتە وەڵام و سەرجەم پروپاگەندەكانی رەت كردەوە و دەڵێ زۆرباشم.
عادل ئیمام بۆ بەرنامەی "ئی تی"ی عەرەبی لێدوانی داوە و جەماوەرەكەی دڵنیا كردووەتەوە كە دۆخی تەندروستیی زۆرباشە، ئەوەی لەبارەی ئەلزەهایمەرەوە باس دەكرێ، تەنیا پروپاگەندەیە.
ئیمام زیاتر گوتوویەتی، سوپای بۆ خوا من زۆرباشم و پێویست بە نیگەرانی و دڵەڕاوكێ ناكات.
وەك گلەییەك بۆ ئەوانەی پروپاگەندە بڵاو دەكەنەوە، زیاتر گوتوویەتی، پێم سەیرە ئەو پروپاگەندانە بۆ دەكرێن و واتایان چییە، كەسێك جارێ لە ژیاندایە و پرسەی بۆ دادەنێن. دڵنیابن كە من زۆرباشم و لەناو ماڵەكەی خۆم لەگەڵ منداڵەكانم و نەوەكانم دەژیم و هیچ كێشەیەكی تەندروستیم نییە.
عادل محەمەد ئیمام محەمەد و لە كاری هونەریدا بە "عادل ئیمام" دەناسرێتەوە كە ناودارترین ئەكتەری كۆمیدیی عەرەب و میسرە، لە ساڵی 1940 لە دایك بووە و لە ساڵی 1966ەوە كاری هونەری دەكات. خاوەنی دەیان فیلمی سینەمایی و چەند شانۆگەرییەكە، لە دوای ساڵی 2000وە لە چەند زنجیرە درامایەكیشدا رۆڵی بینیوە. لەگەڵ زۆربەی ئەكتەرە زۆر ناودارەكانی عەرەبدا كاری كردووە و دەیان خەڵاتی عەرەبی و نێدەوڵەتیی پێ بەخشراوە. بە ناودارترین ئەكتەری كۆمیدی عەرەب ناسراوە و وەك قوتابخانە لێ دەڕوانرێت.