بەردەوامی دان ب گەهاندنا پرۆژێن خزمەتگوزاری بو هەموو دەڤەران، ئەڤرۆ پارێزگارێ دهۆکێ، بەرێ بنیاتی بو چەند پرۆژان ل دەڤەرا شێخان هاتنە دانان.
ل دور پرۆژان، د. عەلی تەتەر، پارێزگارێ دهۆکێ دیارکر کو بهایێ وان پرۆژێن ئەڤرۆ بەرێ بنیاتی بو هاتیە دانان پترە ژ چوار ملیار و 757 ملیون دیناران، کو هەموو پرۆژێن ساڵا 2022ێ بوون و هەتا نوکە ب رێژا 60-70% هاتینە ئەنجامدان و کەفتینە دخزمەتا هاولاتیان دا و گوت، دڤێت هەموو پرۆژە ل دووڤ پیڤەرێن ئەندازیاری بهێنە بجهئینان.
ئەو پرۆژە پێکدهێن ژ دانانا بەرێ بنیاتی بو چێکرنا رێکێن نافخویی ل کومەلگەها چرەی وسەنتەرێ ناوچەداریا قەسروکێ، دانانا بەرێ بنیاتی بو چێکرنا یاریگەهەکا وەرزشی یا 11 یاریزانی ل قەسروکێ ونووژەنکرنا هەردوو بنگەهێن وەرزشی ل قەسروک وشێخان ونوژەنکرنا هولێن بیرەوەریا ل قەسروک وچرەی وچێکرنا مەدرەج وژورێن کارگێری یێن یارگەها کەلەکچی ونوژەنکرنا بنگەهێ ساخلەمیێ ل قەسروکێ وپرۆژێن ئاڤا گوندێن کوپێ ومەلا بروان وگرزەنگل و وپرۆژێ تورێن ئاڤێ وعومبارا ئاڤێ ل قەسروکێ، دانانا بەرێ بنیاتی بو چێکرن وسەخبێرکرنا رێکێن گوندێن (چەم ئەرزن گرمیشان ودرین) وەکو قوناغا ئێکێ وقێرکرنا رێکا گوندێ دەرویشان وگەرمک وچێکرنا رێکا گوندێن شێخ هەسن ومامئێزدینا وچرە ودارەتوو وکەلەکچی و گوندێ زیناڤا نووی وزیناڤا حاجو وبو قوناغا دووێ رێکێن گەرمیشان ودرین دێ هێنە قێرکرن.
دیسان دانانا بەرێ بنیاتی بو کولاانا بیرەکێ ل سنورێ ناوچەداریا ئەتریش ودانانا تورا ئاڤێ بو گوندێ بێبوزیێ وکولانا بیرەکا ئاڤێ بو گوندێ گڤارا وبەرفرەهکرنا تورا ئاڤێ وکولانا سێ بیرا ل سەنتەرێ شێخان وسەخبێرکرنا یاریگەها گوندێ بلان وچێکرنا رێکێن گوندێن نێروەک – دەکان قوناغا ئێکێ هەروەسا ل قوناغا دووێ رێکا گوندێ نێروەک دەکان ب درێاهیا 4،5کم دێ هێتە چێکرن.