یەكێتی هەموو شتێك دەكات بۆ ئەوەی هەڵبژاردن نەكرێت، بەڵام ماف و ویست و خواستی هەموو كوردێك و هێزێكی سیاسییە و دەبێت بكرێت، بۆیە لە سایەی ئەو كارانەی یەكێتی لە هەرێم و بەغدا ئەنجامیان دەدات، چاوەڕوانی شكستێكی گەورەی لە هەڵبژاردنی داهاتوو لێ دەكرێت، ئەو حزبەی لەپێناو بەڕێوەنەچوونی هەڵبژاردن پیلان لەسەر پیلان دەگێڕێت، هەرێم تووشی مەترسی دەكات، پەرلەمانتار و شارەزایان دەڵێن، یەكێتی لە بری سەقامگیری، كار بۆ تێكدانی ئارامیی ناوچەكە دەكات.
لەوبارەوە ئیدریس ئیسماعیل، ئەندامی پەرلەمانی كوردستان بە "وشە"ی راگەیاند، یەكێتی ترسێكی زۆری لە هەڵبژاردن لێ نیشتووە، ئەو ترسەش وای كردووە لە بەغدا هەموو هەوڵێكی خراپ و پیلانێك دابنێت دژی هەرێمی كوردستان، ئامانجەكەی تەنیا ئەوەیە كارێك بكات بۆ ئەوەی هەڵبژاردن نەكرێت، چونكە دەزانێت ئەگەر هەڵبژاردن بكرێت تووشی شكستێكی گەورە دەبێت، یەكێتی ئێستە و لەو چەند ساڵی رابردووش رۆڵێكی خراپی گێڕاوە و سیاسەتێكی خراپی كردووە و نەیتوانیوە خزمەت بە خەڵك بكات، بۆیە ئەنجامەكەی لە هەڵبژاردن وەردەگرێتەوە.
هەروەها گوتی، ترس لە هەڵبژاردن وای لەو حزبە كردووە هەموو شتێك بكات و دەست بۆ چڵە پووشەكەش ببات، بەڵام هیچ شتێك دادی یەكێتی نادا و سبەی دەبێت بچێتە هەڵبژاردن و ئەو دۆڕان و شكستە بچێژێت، حزبێك بەو هەموو مێژووە لە هەڵبژاردن بترسێت، كە مافێكی دیموكراسیانەی هاووڵاتییانە و ئامادەش نییە ئەو مافە بداتە خەڵك، چاوەڕێی چی لێ دەكرێت، ئەوەش بزانێت كە هیچ پیلان و بەرنامە و كارێكی دژی هەرێم لە بەغدا سەر ناگرێت، چونكە ئەوە رێگە راستەكە نییە و خەڵكیش قبووڵی ئەوە ناكەن كە سەقامگیرییان لێ تێك بدرێت و ئارامیی ناوچەكە بخەنە مەترسییەوە.
ئەو پەرلەمانتارە ئەوەشی خستە ڕوو، هەوڵدان بۆ تێكدانی هەرێمی كوردستان و دروستكردنی ئاڵۆزی و رێگرییەكان لە حكوومەت و تێكچوونی پێوەندیی نێوان لایەنەكان، هەمیشە كاری ئەو حزبە بووە، وەك گوتوویانە ترسم لە خۆم هەیە و تێكی دەدەم، یەكێتیش كە ترسی لە هەڵبژاردن هەیە، هەموو هەوڵێكی خۆی دەدات بۆ ئەوەی نەكرێت، لەوكاتەی كوردستان هەڵبژاردنی لەپێشە و دەبێت ئەو هەڵبژاردنە بكرێت، تا هەرێم تووشی مەترسی نەبێتەوە و ئەو سەقامگیرییە تێك نەچێت، دەبێت یەكێتیش ئەوە بزانێت كە هەڵبژاردن هەموو شتێك یەكلا دەكاتەوە.
لای خۆیەوە دیار كەمال، چاودێری سیاسی بە "وشە"ی گوت، دروستكردنی تەنگژە لەپێناو ئەنجام نەدانی هەڵبژاردن لە لایەن لایەنێكەوە چارەسەر نییە، سەرەڕای ئەوەی بەو هۆیەوە سەقامگیریی كوردستان دەكەوێتە مەترسییەوە، لە لایەكی ترەوە دەستبردنە بۆ ئازادی و مافی هاووڵاتییان، چونكە هەڵبژاردن مافێكی ئازادانەی هاووڵاتییانە و ناكرێ لێیان زەوت بكرێت، كە یاسا بۆی دیاری كردوون هە چوار ساڵ جارێك نوێنەری خۆیان هەڵبژێرن و دەنگ بدەنە ئەو لایەن و نوێنەرەی خۆیان دەیانەوێ لەپێناو كاركردن و جێبەجێكردنی داواكارییەكانیان.
هەروەها گوتی، گریمان بەهەر جۆرێك و بەهەر نرخێك بوو رێگری لە هەڵبژاردن كرا، ئەی ساڵی داهاتوو چی، حزبێك ئەگەر خۆی بە خاوەنی دەنگدەر بزانێت و جەماوەرێكی زۆری هەبێت و متمانەی هەبێت ئامادەی هەڵبژاردن دەبێت، بەڵام رەنگە نەبوونی متمانە و بوونی ئەو هەموو كێشە ناوخۆییە، هۆكاری ئەوە بێت لایەنێك نەیەوێ هەڵبژاردن بكرێت و گرفت دروست بكات، بەڵام گرفتی گەورە ئەوەیە لەپێناو ئەنجام نەدانی هەڵبژاردن كار بۆ تێكدانی سەقامگیری بكەیت و لەسەر حیسابی هەرێمێك، كە چواردەوری هەمووی نەیارن و لە خوایان دەوێت هەرێم تێك بچێت.
پێوەست بەو بابەتە عەلی ئەنوەر، چالاكی سیاسی بە "وشە"ی راگەیاند، با بزانین یەكێتی لەپێناو ئەنجام نەدانی هەڵبژاردن و ترسی لە شكستی هەڵبژاردن بە نیازە چی بەسەر كوردستان و خەڵكی ناوچەكە دێنێت، وا دیارە یەكێتی هەموو كوردستان دەكاتە قوربانی بەرژەوەندییەكانی خۆی، یانی ئەمە سیاسەت و كار و بەرنامەی حزبێكە، لەبری چارەسەركردنی كێشەكانی خۆی، لەبری هەوڵدان بۆ سەقامگیریی كوردستان، هەوڵ دەدات هەرێم تێك بدات، ئەمە بیركردنەوەی حزبێك بێت، كەواتە چۆن متمانەی لای خەڵك و جەماوەر دەمێنێت، ئەوانە ئەو جۆرە سیاسەتە دەكەن، بۆیە هەردەم خەڵك لێیان دوور دەكەوێتە، ئەوان بەرژەوەندیی خۆیان پێش بەرژەوەندیی گشتی خستووە.
وشە/ تایبەت