هێشتا بەغدا پارەی مووچەی مانگی نیسانی بۆ هێزە تەناهییەكانی كوردستان رەوانە نەكردووە، بە گوتەی سەرچاوەیەك، كێشەكە چارەسەر كراوە و ئەمڕۆ تا سبەی پارەكە دەكات.
بەقسەی سەرچاوەكەی "وشە" لە كۆبوونەوەی ئەمڕۆی ئەنجوومەنی وەزیرانی كوردستاندا دووپات لەوە كراوەتەوە كە كێشەی مووچەی هێزە تەناهییەكان چارەسەر بكرێت و بۆ ئەمەیش بەغدا بەڵێنی ئەوەی داوە كە ئەمڕۆ یان سبەی پارەكە رەوانە دەكەن.
هەمان سەرچاوە باسی لەوە كردووە، هیچ كێشەیەك لە مووچەی مانگی ئایاری فەرمانبەرانی كوردستان نییە و بەغدا پابەندە بە ناردنی لە وادەی دیاری كراوی خۆیدا.
بەگوێرەی زانیارییەكانی "وشە" تا 24 سەعاتی رابردوو وەزارەتی دارایی و ئابووری هەرێمی كوردستان سەرقاڵی ئامادەكردنی لیستی مووچەی فەرمانبەران بووە بۆ مانگی ئایار تا رەوانەی بەغدای بكات.