لە چەند ساڵی رابردوو پەكەكە بە شێوەیەكی بەربڵاو لە سنووری پارێزگای سلێمانی بڵاو بووەتەوە و لە چەندان ناوچەدا بنكە و بارەگەی هەیە، پێشتر یەكێتیی نیشتمانیی كوردستان رێگەی پێ داون كە لە سنووركە كاری سەربازی و سیاسی و رێكخستنی خۆیان بكەن، بەڵام بۆ لەمەودوا چیتر یەكێتی ناتوانێت دەسەڵاتی بەسەریاندا هەبێت و ئەوان لە كۆنترۆڵ دەرچوون، بۆیە بەهۆی پەكەكەوە خەڵكی ناوچەكە كەوتوونەتە مەترسی گەورەوە.
بڵند فاتیح، چاودێری سیاسی بە "وشە"ی راگەیاند، پەكەكە تاكی كورد و گەنجەكان بە ناوی خەباتەوە دەباتە ریزەكانی خۆی، با هەمووان ئەوە بپرسن ئاخۆ پەكەكە لە كوردستان كاری چییە و كامە خەبات و دەستكەوتەكانیەتی بۆ كورد و باكور؟، ئەجێندای پەكەكە بۆ داهاتووی كوردستان چییە؟، ئەو رێز لە سەروەریی خاكی هەرێم و داودەزگەكانی حكوومەت ناگرێت، ئاخۆ كوردایەتی واتای چییە؟، بەبێ ئەوەی مۆڵەتی یاسایی هەبێت لە كوردستان كاری خۆی دەكات و لە گرووپێكی نایاسایی چەكدار زیاتر هیچ نین، لە ئەنجامی هەڵەكانی پەكەكەدا رۆژانە و بەردەوام لە هەرێم خەڵكی مەدەنی دەبنە قوربانی سەتان گوند چۆڵ كراون.
باسی لەوەش كرد، یەكێتی خۆی دەرگەی ناوچەكەی بۆ پەكەكە واڵا كرد، ئیستەش لە دەستیان دەرچووە و ناتوانن كۆنترۆڵی بكەن، بۆیە پارێزگای سلێمانی بووەتە موڵگەی پەكەكە، ئەمەش بووەتە هۆی ئەوەی میت دەسەڵاتی خۆی بسەپێنێت و توركیاش وەك ناوچەیەكی مەترسیدار تەماشای سلێمانی بكات، بۆیە چیتر پەكەكە ناتوانێت بەئاسانی چالاكی خۆی بكات، چونكە ئاشكرایە كە ناوچەكە چیتر ئەو ناوچە پارێزراوە نییە بۆیان، كە چۆنیان بوێت كار بكەن و رێكخستنەكانیان بێن و بچن، كاتێك لە ئاسمانەوە بە درۆن و لە ناو شاریش هێرش دەكرێتە سەر ئەندام و سەركردەكانیان.
لای خۆیەوە نەژاد مەحموود، رۆشنبیرێكی سلێمانی بە "وشە"ی گوت، پەكەكە ستەم لە سنووری سلێمانی دەكات، راستییەكەی ئەو بۆی دەركەوتووە كە ناتوانێت چیتر خەبات بكات، بۆیە هاتووە لە ناوچەكە گیرساوەتەوە، ئەوەش مەترسییەكی گەورەیە لەسەر تاك بە تاكی خەڵكی كوردستان، بەتایبەتی بۆ سنووری سلێمانی، چونكە ئەوەتا بەهۆی پەكەكەوە خەڵكی سنوورەكە هەر چۆنێك بێت ئارام نین، كاتێك بەهۆی پەكەكەوە خەڵكی مەدەنی دەبنە قوربانی، كەواتە ئەوان ئەو هێزە مەترسیدارەن كە دەبێت خەڵك هەڵوێستی بەرانبەریان هەبێت.
پێوەست بەو بابەتەوە حەسەن سەعید، كادیری پێشكەوتوی پارتی بۆ "وشە" ئاماژە دەكات، پەكەكە هەرێمی كوردستان و سنووری سلێمانی بەتایبەتی خستووەتە مەترسییەوە، ئەوەی لە سلێمانی دەیكات وەك هێزێكی باڵادەست دەبینرێت، دیارە كە هیچ سڵ ناكاتەوە و چۆنی بوێ و هەرچی بیەوێت دەیكات، پەكەكە بچێتە هەر ناوچەیەك بە ئاسانی دەرناچێت هەتا نەبێتە دەسەڵاتدار، بۆیە ئێستە بۆ یەكێتیش قورس بووە بتوانێ ئەو گرووپە دەربكات و ناشتوانێت، چونكە خۆیان لە ناوچەكە باڵادەست كردووە، پەكەكە ئاراستەیەكی نادروست و دوور لە پاراستنی ئینتیمای نیشتمانی هەنگاو دەنێت، بە شێوەیەكی زۆر بڵاو لە سنووری دەسەڵاتی یەكێتی پەرەی سەندووە و كاریگەری لەسەر ئارامی و سەقامگیری و دەروونی و كۆمەڵایەتیی ناوچەكە دروست كردووە.
زیاتر گوتی، ئەوەی لە ناوچەكە لەبارەی ئارامی هەبێت پەكەكە لێی سەندووەتەوە، لە هەمووی خراپتر ئەوەیە ئەگەر ئەوە پەلكێشی نەیارانی گەلی كوردستان نەبێت، پێنجوێن و شارباژێڕ و ماوەت كەی مێرسین و باكوری كوردستانە تا پەكەكە بێت و خەباتی تیادا بكا و بیانكاتە شوێنی تەراتێنی خۆی، پەكەكە دەیەوێ لە كەلار و چەمچەماڵەوە شەڕی توركیا بكات كە وڵاتێكی بەهێزی ناتۆیە، پەكەكە چ ئیشێكی لە شنگال و ناوچەكانی تر هەیە، هەرێمی كوردستان ناوچەیەكی دەستووری ددانپێدانراوە، ئەو هێرشانەی دەكرێنە سەر سەروەریی هەرێم لە رووی ئیداری و جیوگرافییەوە پێشێل دەكەن.
ئەو دەستشلكردنەی یەكێتی بۆ پەكەكە لە سنووری سلێمانی، كە خۆشی ناتوانێت دەستی بەسەردا بگرێت، كاریگەریی خراپی لەسەر ئابووری كوردستان كردووە، كاریگەری لەسەر تاك بە تاكی كوردستان دەبێت، ئەوەی پەكەكە دەیكات لە سنوورەكان لەبارەی بازرگانی مادەی هۆشبەرەوە، كاریگەریی خراپی هەیە و ماڵوێرانی بەدواوەیە.
وشە/ تایبەت