بڕیار بوو ئێوارەی دوێنێ چەند لایەنگرێكی پەكەكە گردبوونەوە ئەنجام بدەن، بەڵام ئاسایش پەلاماری دان و ئەوان دەڵێن، فەرمانی توركیایان جێبەجێ كردووە.
ئێوارەی دووشەم بڕیار بوو لە باخی گشتی كۆنگرەیەكی ڕۆژنامەوانی لەلایەن كۆمەڵێك ڕیكخراوەوە ئەنجام بدرێت، بەمەبەستی ڕاگەیاندنی (بەرەی یەكڕیزی دژی داگیركاری)، بەڵام ئەم كارە بەر لە كۆبوونەوەی خەڵك، ڕووبەڕووی پەلاماردان بوونەوە و تەواوی دەزگاكانی ڕاگەیاندنیشیان دەركرد و پێیان ڕاگەیاندن كە ڕێپێدراو نین هیچ جۆرە ڕووماڵ و زانیارییەك لەبارەی گردبوونەوەكە ئەنجام بدەن.
كار بەمەشەوە نەوەستا و كەسانێك كە بە مەبەستی بەشداریكردن هاتبوون، ڕووبەڕووی پەلامار و ڕێلێگرتن بوونەوە، بۆیە دواجار لیژنەی سەرپەرشتیی (بەرەی یەكڕیزی دژ بە داگیركاری) دەستبەجێ بڕیاری دا كۆنگرە ڕۆژنامەگەرییەكە بباتە بەردەركی سەرا و لەوێ ئەنجامی بدەن.
دواتر دەست كرا بە خوێندنەوەی ڕاگەیاندنە هاوبەشەكە لەلایەن دڵسۆز زەنگەنەوە، لەپڕ هێزەكانی ئاسایش بەشێوەیەكی دڕندانە و ناشیرین پەلاماری بەشدارانیان دا، بەڵام هەڵسووڕاوان شوێنەكەیان جێنەهێشت و بە گوتنەوەی دروشم دژ بە توركیا و هاوكارانی توركیا بەرگرییان كرد، لە بەرانبەر پەلاماردانەكانی ئاسایشدا وەستانەوە و دواتر كەوتنەبەر ئازار و ئەشكەنجەدانی هەڵسووڕاوان، بۆیە سەرباری برینداركردنی هەڵسووڕاوێك كە پیشەی پارێزەرە بە ناوی نەریمان ئەحمەد، بە جۆرێك كە لووتی بە زەبری هێزە تەناهییەكانی سلێمانی شكێنراوە.
میدیاكانی سەربە پەكەكە دەڵێن، لەم دەڤەرەدا كە ساڵەهایە لافی ئازادی و دیموكراسی لێ دەدرێت، دوێنێ لەبری ڕووبەڕووبوونەوەی پۆلیس و ئاسایشی توركیا، كەوتنە وێزەی دەنگی ئازادیخوازان، لەبری راوەستانەوە و فەرمانی توركیایان جێبەجێ كرد.