بریكاری وەزارەتی ڕۆشنبیریی هەرێمی كوردستان ڕای گەیاند، سروشتی جوانی كوردستان لایەنە مێژوویی و شوێنەوارییەكەی، هۆكاری باشن تا سینەمای جیهانی بۆ رابكێشرێت و فیلمی گەورەی تێدا بەرهەم بهێنرێت.
ئاریان سەڵاحەدین بریكاری وەزارەتی ڕۆشنبیریی حكوومەتی هەرێمی كوردستان رای گەیاند، لە دوای دەستبەكاربوونی كابینەی نۆیەم، وەزارەتی ڕۆشنبیری لەسەر ڕێنوێنی و ڕاسپاردەی مەسروور بارزانی سەرۆك وەزیران، لە هەموو ڕوویەكەوە بایەخی بە فەرهەنگ و هونەر و ڕۆشنبیری داوە، بەتایبەتی هونەری سینەما.
ئەو بەرپرسەی وەزارەتی رۆشنبیری ئەوەشی گوتووە، هەر رێنوێنی و بایەخی سەرۆكی حكوومەت وایكرد لە ماوەی تەمەنی ئەم كابینەیەدا سەرەڕای قەیرانەكانی دارایی و بڵاوبوونەوەی پەتای كۆرۆنا، بەڵام چوار فێستیڤاڵی گەورەیی سینەمایی ساز كراون و لە هەر چوار فێستیڤاڵەكەشدا جگە لە سینەماكارانی ناوخۆ، ئەكتەر و دەرهێنەرانی سینەماكاری بیانی و ناوچەیی بانگهێشت كراون، ئەو فێستڤاڵانەش جێی خۆیان گرتووە و سەرنجی سینەماكارانی بیانی ڕاكێشاوە.
بریكاری وەزارەتی ڕۆشنبیری باسی لەوەش كردووە، مەسروور بارزانی لە 2021 و لە هەشتەمین فێستیڤاڵی فیلم لە دهۆك ئاماژەی بەوە دا، "سروشت و ژینگەی هەرێمی كوردستان بۆ چوونە ناو فیلمە جیهانییەكان گونجاوە، كوردستان سروشتێكی جوان و لەباری هەیە بۆ ئەوەی سەرنجی سینەماكارانی بیانی بۆ ڕابكێشرێت".
ئاریان سەڵاحەدین ئاماژەی بەوە دا، تا ئێستە چەندان كۆمپانیا و سینەماكار و بەرهەمهێنەری دیاری فیلمی سینەمایی هاتوون، لە داهاتووشدا سینەماكاری تریش دێن بۆ سوودبینین لە سروشت و پێگە مێژووییەكانی هەرێمی كوردستان.
"جگە لە سروشت و شوێنەوارە مێژووییەكان، تەناهی و سەقامگیریی هەرێمی كوردستان، فاكتەرێكی ترن بۆ ڕاكێشانی سینەماكاران و كۆمپانیا ناودارە نێودەوڵەتییەكانی بەرهەمهێنانی فیلم تا بێنە هەرێمی كوردستان و كارە هونەرییەكانیان لێرە بكەن". ئاریان وای گوت.