ئاسایشی هەولێر گیرانی ژن و پیاوێكی لە هەولێر راگەیاند، كە ژنەكە منداڵەكانی خۆی بەكارهێنابوو بۆ ئاسانكاریی تاوانەكان و بەهۆیەوە چەند ئامێرێكی مۆبایل و جانتای پارەیان دزیوە، هاوكات پیاوەكەش لای خۆیەوە هەستاوە بە شكاندنی جامی ئۆتۆمبێلی چەندان هاووڵاتی و دزینی پارە و كەلوپەلەكانی ناو ئۆتۆمبێلەكان.
ئەمڕۆ چوارشەم 31ی تەمووزی 2024، لە راگەیەنراوێكی بەڕێوبەرایەتیی ئاسایشی هەولێردا هاتووە، دوای ئەنجامدانی بەدواداچوون لە لایەن تیمەکانمانەوە لەسەر چەند حاڵەتێکی دزیکردن لە چەند شوێنێکی ناوشاری هەولێر، توانیمان ناسنامەی تۆمەتبارەکان ئاشکرا بکەین.
لەبارەی تۆمەتبارەكانەوە ئاسایش ئاشكرای كردووە كە یەکێک لە تۆمەتبارەكان ئافرەت بووە و منداڵەكانی بۆ كارئاسانیی خۆی بەكارهێناوە. وەك لە راگەیەنراوەكەدا ئاماژەی پێ كراوە، بە فەرمانی دادوەری لێکۆڵینەوەی ئاسایشی هەولێر تۆمەتبارەكان گیران. تۆمەتبارە ئافرەتەکە منداڵەکانی کە تەمەنیان لەنێوان حەوت بۆ 10 ساڵ دەبێت بەکارى هێناون بۆ سەرقاڵکردنی هاووڵاتییان و لە چەند شوێنێکی گشتی ئامێری مۆبایل و جانتای پارەیان دزیوە.
لەبارەی تۆمەتبارە پیاوەكەشەوە ئاسایش جۆری تۆمەتەكەی دیاری كردووە و هاتووە "جامی چەندان ئۆتۆمبێلی هاووڵاتییانی شکاندوە و هەڵساوە بە دزینی کەلوپەل و پارەی ناو ئۆتۆمبێلەکان".