پێكئینانا ههڤژینیێ ئێك ژ یاسایێن ژیانێ یه و ههر كهسێ بگههیته ژیێ پێگههشتنێ مافێ پێكئینانێ ههیه، بهلێ پشكهك ژ وان كهسێن كو گههشتینه ژیێ پێگههشتنێ ب تایبهتی د نوكه دا ترس ل ئهنجام دانا وێ ههیه، پرانیا جاران ژی ئهگهر دزڤرن بۆ ئاریشهیێن دارایی و جڤاكی، ل دهوکی هەمبەر سالێن بوری مارەبرن چ پێشڤەچونێن بەرچاڤ بخوڤە نەبویە.
سوزدار حهسهن، گهنجهكی دهۆكێ یه، گۆت، رهنگه ئهگهر زوربن كو گهنجان ترس ژ پێكنهئینانا ههڤژینیێ ههبیت، بهلێ ب دیتنا من ئێك ژ گرنگترین ئهگهرا ئهوه كو گهنج د ترسیت ههڤژینیهكا سهركهفتی پێكنهئینیت، ئهڤجا چ ژبهر رهوشا دارایی بیت یان ژی جڤاكی، دیسان هندهك جاران مرۆڤ دكهڤیته بن ئهزموونا وان كهسێن خێزان پێكئینایی ب تایبهتی دهمێ دبێژن ههڤژینی كارهكێ باش نیه و خوه ژێ دور بكهت، بهلێ ب دیتنا من مهزنترین ئهگهر كو گهنجان ترس ل پێكئینانا ههڤژینیێ ههبیت ئهوه كو رهوشا دارایی و ئابووری یا گهنجان ب تایبهتی د نوكه دا وهكو پێدڤی باش نینه، لهوا ژ ترسا داهاتی خوه ژ ههڤژینیێ دور دكهت یان ژی گیرو دكهت.
هیڤی دوسكی، ئهو ژی گهنجهكا دهۆكێ یه، ئهو ل سهر بابهتی دبێژیت، ب راستی ژی د نوكه دا ئاڤاكرنا خێزانێ زۆر ب زهحمهت و ب ترسە، ژبهر نهبونا كاری چونكی پرانیا كارێن نوكه دهمكی نه، ئهڤه زێدهباری كو زۆر كێمه و مهرجێن وان زهحمهته و داهاتێ وان ژی كێمه، لهوا زوو ب زوو نهشێت خوه نێزیكێ پێكئینانا ههڤژینیێ بكهت، دیسان پشكهك ژ گهنجان ژی دهرچویێن زانكو و پهیمانگههانن و ژیێ خوه ههموو ب خواندنێ ڤه بر، ئهو وهكو پێدڤی چوو كارێن دی نوزانن بكهن، ناهێنه دامهزراندن ژی ئهڤه ژی ئێكه ژ وان ئهگهرێن كو گهنج ژ پێكئینانا ههڤژینیێ ب ترسیت، ئهگهر ئهوا دارایی و دهرونی یا گهنجان باشتر بیت بێگومان دێ هزرێن وان ژی بۆ ئاڤاكرنا خیزانهكێ هێنه گوهرین، ئەز بخو حەزدکم ژیانا هەڤژینی پێکبینم، بەلێ وەکی دبینم خوشک و هەڤالێن من ئاریشە بو چێبوینە، ئەز ترسم یان پەشیمان دبم.
ئهحمهد ئهرزی، ئهو ژی گهنجهكێ دهۆكێ یه دیاركر كو بهری نوكه خهلكی ب شێوهیێ ههڤكاری، هاریكاریا وان كهسان دكر كو دخواست ههڤژینی پێكبینیت، بهلێ د نوكه دا ئهڤ یهك نینه و گۆت، خهلكێ بهرێ ب كێمی رازی دبوون و ههموو كار ژی دكرن، لهوا دلێ وان خوش بوو و ههڤژینی پێكدئینا، نوكه كو ژیان هاتیه گوهرین و پێدڤی یا خهلكی پتر بویه، ئاستهنگێن ههری مهزن ههمبهر گهنجان دروستكرینه، نوكه دهستكهفتنا كاری بویه موعجیزه و تشتهكێ حێبهتی یه، چونكی كار نینه و ههبیت ژی داهاتهكێ كێمه و دهمكی یه و مهرجێن وان گرانن و د شیانێن گهنجان دا نینه، ئهڤه زێدهباری كو دبیت ل دهرڤهیێ ئهو بسپوریا گهنجان بیت كو تێدا خواندی، نوكه پشكهكا ههری زۆر یا وان كهسێن ههڤژینیی پێكئینای ب هیڤیا دایباب و كهسوكارێن خونه، دهستكهفتنا پارێ داوهتێ و خانی و زێر و ههتا دوماهیێ كارهكێ ههری ب زهحمهته و چوو ئالیێن شولهژێ ههڤكاریا وان ناكهن ب تایبهتی پشتی كو پێشینهیێن ههڤژینیێ هاتیه راگرتن، لهوا پشكهك ژ گهنجان ژبهر نهبونا شیانان قهستا ئهورۆپا كریه، بەری نوکە پێشینەیا ئاڤاهی و هەڤژینیێ هەبو، نوکە نینە، ئەگەر بزڤریت ڤە بێگومان دێ رەوشا گەنجان باشتر بیت، ئەز دێ ئێک بم ژ وان ک هەڤژینی پێکبینیت، چونکی نوکە زور ترس مە هەنە.
ب گورەی داهاتێن دهوکێ، دڤان سالێن بوری دا رێژا مارەبرین کێم بویە یان ژی چ پێشڤەچون بخوفە نەدیتنە، د هەمبەر دا رێژا جودابونێ زورە، ئەگەرێن ڤێ یەکێ ژی زورن، بەلێ ئێک وان ئەگەرا دزڤریت بۆ رەوشا دارایی و ئاستێ تێگەهشتنێ و هەژینیا پێشدەم و یان زوو.