شارەزایان وریایی لەبارەی مەترسیداریی ورگ لە مرۆڤ دەدەن، كە سەرچاوەی زۆر نەخۆشی و كێشەی تەندروستییە، توێژینەوەیەكی نوێ ئاماژە دەكات لەگەڵ گەورەبوونی زیاتری ورگ، ناوچەی تایبەت بە یادەوەری لە مێشكی مرۆڤ بچووكتر دەبێتەوە، پارچەكانی بێتا ئەمیلۆید و تێكهەڵكێشیی تاو لەو ناوچانە بەدیار دەكەون، واتە لە تەمەنێكی زوو لە 40 و 50 ساڵی، كە ئەوەش هۆكاری تووشبوونە بە ئەلزەهایمەر.
د. سایرۆس راجی، سەرۆكی تیمی توێژینەوەكە و مامۆستای یاردەدەری تیشك لە كۆلێجی پزیشكی لە زانكۆی واشنتن دەڵێت، جۆرێك لە چەوریی سك كە بە چەوری هەناو ناسراوە، پێوەندیی بە هەوكردن و كۆبوونەوەی ئەمیلۆید لە مێشكی 32 پیاو و ژن لە تەمەنی 40 بۆ50 ساڵی هەبوو.
چەوریی هەناو ئەو چەوریەیە كە دەوری ئەندامە ناوخۆییەكانی لەشی مرۆڤ دەدات و لە چەوری ژێر پێست زۆر جیاوازە كە 90%ی چەوری لەش پێكدێنێت، دەركەوتنی بێتا ئەمیلۆید و تێكهەڵكێشیی تاو ئاماژەی سەرەتایین بۆ دەركەوتن و تووشبوون بە ئەلزەهایمەر، هەرچەند رێژەی ئەوانە زیاتر بێت، توندی نەخۆشییەكە زیاتر دەبێت.
وەك ئەو مامۆستایە دەڵێت، لە نیشانەكانی كەسی نەخۆش، كەمبوونەوەی گەیشتنی خوێن بۆ مێشك و بچووكبوونەوەی یان تێكچوونی مادە خۆڵەمێشی مێشك، قەڵەوی رۆڵی لە تووشبوون بەو نەخۆشییە هەیە، بۆ نموونە لە ئەمەریكا 1%ی كەسانی پێگەیشتوو بەهۆی قەڵەوییەوە مەترسی تووشبوونیان بەو نەخۆشییە هەیە، واتە زیاتر لە دوو ملیۆن كەس بەهۆی قەڵەوی مەترسی تووشبوونیان بە ئەلزەهایمەرەوە هەیە.
راجی دووپاتی كردەوە، دەمانەوێ لەوە تێبگەین چۆن كەسان لە تەمەنی 40 و 50 ساڵی تووشی ئەلزەهایمەر دەبن یان ئەگەری تووشبوونیان زیاتر دەبێت، لەوكاتەی نەخۆشییەكە لە 60 و 70 و 80 كانی تەمەن دێت، لە توێژینەوەكە دەركەوت پێوەندی لە نێوان بوونی چەوری هەناو و ورگ و بچووكبوونەوەی مێشك یان تێكچوونی مادەی خۆڵەمێشیی مێشك لەو بەشەی تایبەتە بە یادەوەری هەیە، ئەوەش نیشانەیەكی تووشبوونە بە ئەلزەهایمەر.