کۆمەڵگەی کوردانی جوو لە ئیسرائیل بانگەوازێکی بەپەلە بۆ ڕۆژئاوای کوردستان ڕادەگەیەنن، لە بانگەوازەكەدا پێشنیازی هێنانەكایەی دامەزراوەیەك یا ئەنجوومەنێك دەكەن لە تاكی ژیر و ئاقل لە ناو گەلی كوردستان لە سووریا، بۆ پاراستنی گەلی كورد لەو ئەجێندا حزبییە شاراوە و دابەشكارانەی كە زۆر زاڵن بەسەر دیمەنی سیاسیی ناوچەكە.
هۆكاری ئەم بانگەوازە بەپەلەیەی كۆمەڵگەكە بۆ هەڕەشەی داگیركاری توركیا لە لایەك و سیاسەتە نوێیەكانی دەوڵەتی سووریا گێردراوەتەوە، لەگەڵ پێویستیی سەرکردایەتی لە دەرەوەی ئەجێندا سیاسییەکان.
ئەمڕۆ چوارشەم 18ی كانوونی یەكەمی 2024، لە بانگەوازێكدا بۆ كوردانی رۆژئاوای كوردستان لەلایەن كۆمەڵگەی كوردیی جووەكان لە سەرانسەری دنیادا هاتووە، سڵاوی دڵسۆزانەتان ئاڕاستە دەکەین و هاوسۆزی لەگەڵ خواستەکانتان بۆ ئازادی و کەرامەت و ئایندەیەکی خۆشگوزەران دەوەستینەوە.
لە بەشی یەكەمی بانگەوازكەدا روون كراوەتەوە كە لەم کاتە گرنگە مێژووییەماندا، گەلەکەمان ڕووبەڕووی کۆسپ و هەڕەشەی قووڵ دەبێتەوە، بە دیدگا و هیوایەک بۆ یەکڕیزی و سەرکردایەتی بانگەوازتان لێ دەکەین، کاتی ئەوە هاتووە دامەزراوەیەک یان ئەنجوومەنێک لە تاکی ژیر و عاقڵ لە ناو گەلی کوردمان لە سووریا بەگشتی و لە رۆژئاوای کوردستان بەتایبەتى دابمەزرێنین، کە نوێنەرایەتیی ئەو ڕۆشنبیر و سەرکردە و حەکیمانە بکەن کە ڕۆحی کولتووری بە کۆمەڵمان بەرجەستە دەکەن.
لەبارەی ئەم پێشنیازە بۆ ئەنجوومەنەكەوە، لە بانگەوازەكەدا هاتووە، ئەم ئەنجوومەنە دەبێت کار بکات بۆ پاراستنی گەلەکەمان لەو ئەجێندا حزبییە شاراوە و دابەشکەرانەی کە زۆرجار زاڵن بەسەر دیمەنی سیاسیی ناوچەکەماندا.
هۆكاری بەپەلەیی ئەم بانگەوازە بەم چەند خاڵەی خوارەوە روون كراوەتەوە:
1. هەڕەشەی داگیرکاریی تورکیا:
داگیرکاریی تورکیا مەترسییەکی وجودی بۆ سەر خاکەکەمان و کولتوورەکەمان و خودی مانەوەمان وەک گەلێک لە ڕۆژاڤا دروست دەکات. ئامانجە درێژخایەنەکانیان ڕوونە: هەڵوەشاندنەوەی خۆبەڕێوەبەریی کورد و سەرکوتکردنی خەباتی ئێمە بۆ سەربەخۆیی.
2. سیاسەتە نوێیەکانی دەوڵەتی سووریا:
دەسەڵاتی تازەپێگەیشتووی سووریا بەڵگەی کەمی نیشانداوە لەسەر نیازپاکی بەرانبەر بە گەلەکەمان. نابێت ڕێگە بدرێت سیاسەتەکانی پەراوێزخستن و بەعەرەبکردن و گۆشەگیری کە ڕژێمەکانی پێشوویان دیاریکردبوو سەرهەڵبداتەوە.
3. پێویستیی سەرکردایەتی لە دەرەوەی ئەجێندا سیاسییەکان:
حیزبە سیاسییەکانی ئەم بەشەی کوردستان، وێڕای ئەوەی کە بۆ خەباتی ئێمە ژیانیان هەیە، بەڵام زۆرجار دەکەونە ژێر کاریگەریی دەرەکی و تەماحی کەسییەوە. ئەمەش گەلەکەمانی لاواز و شکاو کردووە.
لە بەشێكی تری بانگەوازەكەدا باس لە چەند دیدگا و پێشنیازێك بۆ ئەنجوومەنی ئاقڵمەندان كراوە كە بانگەوازی بۆ كراوە بەم خاڵانەی خوارەوە:
پێشنیازی دروستکردنی ئەنجوومەنی ئاقڵمەندان لە ڕۆژاڤا دەکەین، ئەم ئەنجوومەنە ئەم ئەرکانەى پێ دەسپێردرێ:
- بڕیاردانی چارەنووسساز بە شێوەیەکی شەفاف: هەموو بڕیارەکان دەبێت بەرژەوەندییە باڵاکانی گەلی کورد لە سووریا لە پێشینە دابنێن.
- کارکردن بۆ سەربەخۆیی: مۆدێلی هەرێمی کوردستانی عێراق سەرکەوتوو بووە لە هاوسەنگکردنی خۆبەڕێوەبەری لەگەڵ سەقامگیریی ناوچەکەدا، ئەمەش دەبێت ئیلهامبەخش بێت بۆ ئامانجەکانمان لە سووریا.
- پاراستنی یەکڕیزی: بەر لە دانوستان لەگەڵ هێزە دەرەکییەکان یان دەسەڵاتەکانی تر، پێویستە پێوەندیی ناوخۆیی خۆمان پتەوتر بکەین و دووبەرەکی تێپەڕێنین و بەرەیەکی یەکگرتوو بخەینەڕوو.
لە درێژەی بانگەوازەكەدا باس لەوە كراوە، گەلەکەمان بە دەیان ساڵ لە چەوساندنەوە و نکۆڵیکردن لە ناسنامەمان بەرگەی ئازاری بێئەندازەی گرتووە. بەڵام خۆڕاگریمان دەریخستووە کە دەتوانین لە سەرووی ئەم تەحەدایانە بەرز ببینەوە، بۆ دەستەبەرکردنی ئایندەیەک کە دەنگی کوردی تێدا ببیسترێت و ڕێزی لێ بگیرێت، پێویستە یەکڕیزی بنیات بنێین و ڕیزەکانمان پتەوتر بکەین. تەنیا لە ڕێگەی هاوپشتی و ڕێزگرتنی یەکترەوە دەتوانین هیوای بەدەستهێنانی سەربەخۆیی و ئازادی بۆ ڕۆژاڤامان هەبێت.
لە دوا بەشی بانگەوازەكەدا هاتووە، داوا لە ئێوەی خوشک و براکانمان لە رۆژئاوای کوردستان و سووریا دەکەین، پێشوازی لەم بانگەواز و پێشنیارەمان بکەن و هەنگاوی یەکەم بەرەو دامەزراندنی ئەم ئەنجوومەنە بنێن. با چرای ئومێد و هێمای یەکڕیزی و سەرچاوەی حیکمەت بێت بۆ هەموو کورد. با ڕێز لە قوربانیدانی باوباپیرانمان بگرین و پێکەوە کار بکەین بۆ ئایندەیەک کە منداڵەکانمان بتوانن بە ئارامی و خۆشگوزەرانی و دوور لە ترس و ستەم بژین، ئیرادەی سەربەخۆ؛ ئابووری و سیاسەت و خاکێکی سەربەخۆی لێ بەرهەم دێت.