هوستایەکێ چێکرنا کێکا ل دهوکێ، مەزنترین کێک ل کوردستانێ دروستکر کو 41 قات بویە، ب هزار و 500 دولاران فروت، نافێ وی ب چێکرنا کێکا ل دهوکێ چویە.
عەبدولجەبار سەعید بەرواری، هوستایێ چێکرنا کێک و شیریناهیان ل دهوکێ بۆ وشە گوت: ل سالا 1987ێ ل موسل من دەست ب چیکرنا کێک و شیریناهیان کریە و هەتا سالا 1990ێ ل موسلێ بەردەوام بووم، پاشی ل سالا 1995ێ من جهەکێ تایبەت بخۆ ل باژێرێ دهۆکێ ڤەکر و تایبەت بوو ب چێکرنا کێک و شریناهیان، ئەڤ جهە ژی هەتا سالا 2008ێ یا بەردەوام بوو، پاشی هەر ل دهۆکێ ل سالا 2009ێ من کارگەهەکا چێکرنا کێک و شیریناهیان دانا و هەتا سالا 2018ێ یا بەردەوام بوو.
زێدەتر گوت: ژبەر شەرێ داعش و کاودانێن دارایی، دیسان بورینا تەمەنێ من، من نەشیا بەردەوامیێ ب کارێ خۆ بدەم، لەوا من دەست ژێ بەردا و نوکە ل مال رونشتی مە و بێ کارم.
ناڤبری دیارکر کو ئەوی چەندین کێکێن مەزن بۆ بوک وزاڤا و هەلکەفتێن دایکبونێ و جودا دروستکرینە و گوتژی: مەزنترین کێک من دروستکری 41 قات بوو، من ب هزار و 500 دولاڕان فروت، چێکرنا وان زور یا ب زەحمەتە و مروڤ پێڤە ماندودبیت، بەلێ د هەمان دەم دا هەستەکێ خوش بۆ مروڤی دروست دبیت خزمەتا خەلکێ خۆ بکەت ب کارەکێ جیاواز.
هوستایێ ناڤبری ل سالا 1969ێ ل گوندێ بێباد ئیسلام ژ دایکبویە و خێزاندارە و ل باژێرێ دهوکێ دژیت.