بەرپرسێكی پارتی دیموكراتی كوردستان رای دەگەیەنێت، پارتی و یەكێتی بۆ پێكهێنانی حكوومەتی نوێ گەیشتوونەتە خاڵی كۆتایی و دەبێتە مژدانەیەكی خۆش بۆ خەڵكی خۆمان بۆ جەژن و حكوومەتێكی سەرانسەری دەبێت.
ئەمڕۆ یەكشەم 23ی ئادار، كرمانج عزەت بەرپرسی لقی 26ی گوڵانی پارتی دیموكراتی كوردستان لە دەڤەری باڵەكایەتی، بە "وشە"ی راگەیاند، ئەوەی مژدەی خۆشە لە نەورۆز و لە جەژنی رەمەزان، نزیكبوونەوەی زۆر هەیە بۆ گەیشتن بە خاڵەكۆتاییەكانی پێكهێنانی حكوومەتی نوێی ھەرێمی كوردستان و ئەوەش باشترین جەژنانەیە.
روونیشی كردەوە كە دۆخی ناوچەكە پێویستیی بەو ھەنگاوە خێرایانە ھەیە و پێكھێنانی حكوومەت بەرنامەیەكی زۆر فراوانە و پڕۆژەی خزمەتگوزاری زۆر گەورە لە بەرنامەی كاری كابینەی 10یەم دەبێت.
ئەو بەرپرسەی پارتی ئاماژەی بۆ ئەوەیش كرد كە حكوومەتی ئەمجارە سەرانسەری دەبێت و یەك هێزی پێشمەرگە و یەك پەرلەمان و یەك حكوومەت و یەك ھەرێمە و بڕیارەكە بەوشێوەیە و "ئەوە دەبێتە سەرەتایی ھێوركردنەوەی ئەو دۆخەی ھەیە كە لە ڕابردوو زەرەری لێداین".
وشە/ بڵند ئیبراھیم