بڕیارە هەینی داهاتوو لە كۆنگرەیەكی فرەوان لە شاری قامیشلۆ بە ئامادەبوونی هەموو هێزە سیاسییەكان دیدی هاوبەشی سیاسیی لایەنەكانی بزاوی كورد لە سووریا بێتە راگەیاندن، كە لە چەندان بڕگە پێك هاتووە و دووپات لەسەر مافی پێكهاتەی كورد لە سووریا دەكاتەوە.
بەپێی سەرچاوەیەك كۆنگرەكە بە ئامادەبوونی 300 كەسایەتی، لەوانە بەرپرسانی پەیەدە و ئەنجوومەنی نیشتمانیی سووریا و حزبە سیاسییەكانیتر، لە پاڵ رێكخراوەكانی كۆمەڵی مەدەنی و سەندیكا و رێكخراوەكانی ژن و لاوان لە شاری قامیشلۆ ساز دەكرێت، پێشبینیی ئامادەبوونی بەرپرسانی هاوپەیمانی نێودەوڵەتی دژ بە داعش و مەزڵووم عەبدی فەرماندەی هەسەدە و نوێنەری سەرۆك بارزانی لە كۆنگرەكە دەكرێت.
رەشنووسی دیدە سیاسییەكەی كورد لە سووریا لە دوو بەش و زیاتر لە 25 بڕگە پێك هاتووە، دووپات لەوە دەكاتەوە كە سووریا دەوڵەتێكی فرەنەتەوە و كولتوور و ئاینە، پێویستە لە دەستوورەكەی مافی هەموو پێكهاتەكان لە عەرەب و كورد و سریان و ئاشووری و توركمان و تایفە ئاینی و مەزەوییە جیاجیاكان فەراهەم بكرێت.
بەپێی دیدەكە، پێویستە پابەندی بە رێككەوتن و بەڵێننامە نێودەوڵەتییەكان و پرەنسیپی هاووڵاتیبوونی یەكسان و مافی مرۆڤ بكرێت، سیستمی فەرمانڕەوایەتیی وڵات پەرلەمانی تێكەڵ بێت پشت بە فرەیی سیاسی و لێكجیاكردنەوەی دەسەڵاتەكان ببەستێت، لامەركەزیەت جێبەجێ بكرێت بۆ مسۆگەریی دابەشكردنێكی دادوەرانەی دەسەڵات و سامان، بوونی نوێنەرایەتیی فرەیی نەتەوەیی و كولتووری لە ناوی دەوڵەت و ئاڵا و سروودی نیشتمانی.
لایەنگرینەكردنی دەوڵەت بۆ ئاینەكان و دداننانی فەرمی بە ئاینی ئێزدی، رەچاوكردنی تایبەتمەندیی هەموو پێكهاتەكان و یەكسانی نێوان رەگەزەكان، هەڵوەشاندنەوەی ئەنجامی گۆڕانكاریی دیمۆگرافی و رێخۆشكردن بۆ گەڕانەوەی ئاوارەكان، بەتایبەتی لە ناوچە كوردنشینەكانی وەك عەفرین و سەری كانی و گرێ سپی، ددانانی دەستووری بە بوونی نەتەوەی كورد لە سووریا و مسۆگەری مافەكانی بەپێی بەڵێننامە نێودەوڵەتییەكان، یەكخستنی ناوچە كوردییەكان وەك یەك یەكەی سیاسی و ئیداری لە چوارچێوەی سووریای فیدراڵیدا.
دداننانی دەستووری بە مافی سیاسی و و كولتووری و ئیداری كورد، دانانی زمانی كوردی وەك زمانێكی فەرمی لەپاڵ زمانی عەرەبی و مسۆگەریی خوێندن و فێركردن بەو زمانە، دامەزراندنی بنكەی رۆشنبیریی و میدیایی كوردی و مسۆگەریی نوێنەرایەتیی كوردی لە دامەزراوەكانی یاسادانان و جێبەجێكردن و دادوەریی دەوڵەت.
حسێبكردنی جەژنی نەورۆز وەك جەژنێكی فەرمی لە سووریا، هەڵوەشاندنەوەی سیاسەتە جیاكارییەكان لە دژی كورد، وەك تەعریب و قەرەبووكردنەوەی زیانلێكەوتووان، گەڕاندنەوەی رەگەزنامەی سووری بۆ كورد، كە لە سەرژمێریی 1962 لێی بێبەش كران، ئاوەدانكردنەوەی ناوچە كوردییەكان و تەرخانكردنی بەشێك لە داهاتی سامانەكانی بۆ پڕۆژەكانی پەرەپێدان و ئاوەدانكردنەوە و قەرەبووكردنەوەی ساڵانێك لە فەرامۆشكردن و پشتگوێخستن.