ئەگەچی نەخۆشییەكی مەترسیدارە و تا ئێستە بە وردی هۆكار و چارەسەری دیار نییە، بەڵام ئەوەندەی لەبارەوە گوتراوە كە مرۆڤ دەتوانێت تا ئاستێك خۆی لێ بپارێزێت، ژیان و خۆراكی تەندروست و وەرزش و جووڵانەوە كلیلی چارەسەری هەموو كێشەیەكی تەندروستین لەوانەش شێرپەنجە، رەنگە كە باسی شێرپەنجە دەكرێت مرۆڤ بیری بۆ جگەرە و بەركەوتنی تیشك و خواردنەوەی زۆری مادە كحولییەكان بچێت، بەڵام هۆكاری تریش هەن وەك رۆژنامەی
"واشنتن پۆست" باسیان دەكات و لە خوارەوە هاتوون:
*تاتۆ، لە توێژینەوەیەكی شیكاری لە سوید دەركەوت كە ئەوانەی تاتۆیان كردووە بە رێژەی 21% زیاتر ئەگەری تووشبوونیان بە گرێی لیمفی هەیە، لە توێژینەوەیەكی دانیماركیش دەركەوت كە پێوەندی لە نێوان تاتۆ و گرێی لیمفی و شێرپەنجەی پێستەوە هەیە.
*كێشانی نێرگیلە، رەنگە شارەزایان باسی بكەن و كەسانی ئاساییش ئەوە بزانن كە كێشانی نێرگیلە لە جگەرەی ئاسایی خراپتر و كاریگەرترە لەسەر تەندروستی، ئەوان زیاتر یەكەم ئۆكسیدی كاربۆن هەڵدەمژن، جگەرە كۆتایی دێت، بەڵام نێرگیلە كاتی زیاتر دەبات، جیا لەوە ئەوان بڕی زیاتری مادەی كیمیایی ژەهراوی هەڵدەمژن، دەركەوتووە ئەو دووكەڵەی كەسێك لە كێشانی یەك سەعات نێرگیلە هەڵی دەمژێت، 100 تا 200 جار زیاترە لە كێشانی جگەرەیەك، بۆیە ئەوان زیاتر ئەگەری مردنیان بە شێرپەنجەی جگەر و سیییەكان و سەر و مل و گەدە هەیە.
*خواردنەوەی زۆر گەرم، توێژینەوەیەكی چینی باسی ئەوە دەكات كە ئەوانەی رۆژانە چای زۆر گەرمیان خواردووەتەوە، مەترسیی تووشبوونیان بە شێرپەنجەی سورێنچك پێنج هێند زیاترە، چونكە بە تێپەڕبوونی كات چای زۆر گەرم خانەكانی سورێنچك لەناو دەبات، هەمان شت بۆ قاوە راستە، بەڵام لە توێژینەوەكان دەركەوتووە كە ئەو حاڵەتە پێوەندی بە چایەكەوە نییە، بگرە بەهۆی زۆر گەرمییەكەیەتی.
*بۆیەی كیمیایی و رێكخەری قژ، ئەوەی بەهۆی مادەی فۆرمالدیهایدی كە تیایەتی، كە مادەیەكی شێرپەنجەییە، یان مادەی فسالات كە كێشە لە كوێرە رژێنەكان دروست دەكات، شێرپەنجەی رژێنەكانی وەك مەمك و هێلكەدان دروست دەكات، دەركەوتووە بەكارهێنانی بەردەوامی بۆیەی قژ پێوەندی بە زیادبوونی مەترسیی تووشبوون بە شێرپەنجەی مەمكەوە هەیە.
*گۆشتی برژاو لەسەر ئاگری زۆر بەهێز، واتە برژاندنی گۆشتی سوور و مریشك و ماسی لەسەر ئاگرێكی بەهێز و لە پلەیەكی بەرزی گەرمیدا، لە كاتی كارلێكی پرۆتینی گۆشتەكە لەگەڵ گەرمییەكەوە، دەبێتە هۆی بەرهەمهێنانی مادەی شێرپەنجەیی وەك بازنەی ئەمینات و هایدرۆكاربۆنی فرە بازنەیی و هیتریش، یان كەوتنی شلە و چەوریی گۆشتەكە بۆ سەر ئاگرەكە گڵپە و دووكەڵی زۆر دروست دەكات، دەركەوتووە ئەوانەی زیاتر گۆشتی بەو شێوەیە دەخۆن مەترسیی تووشبوونیان بە شێرپەنجەی قۆلۆن و رێكە زیاترە، بۆیە جیا لە پێویستیی دووركەوتنەوە لە گۆشتی پەرهەمێنراو، پێویستە خواردنی گۆشتی برژاویش كەم بكرێتەوە.