وەك ڕوون و ئاشكرایە لە مێژووی دوور و نزیكدا میلەتی كورد زۆر خەنجەری بەر پشت كەوتووە لەلایەن یار و نەیارانیەوە، زۆر جار وا ڕێككەوتووە ئەوەی ژەهری دەرخوارد داوە، لە كاتێكی تردا دەستی هاوكاریی بۆ درێژ كردووە و هاوكاری بووە لە كاتە تەنگانەكان و ڕزگاری كردووە، ئەمەش ڕاستی و دروستی سیاسەتە كە دەستێك گوڵ و دەستەكەی تری خەنجەر، لە هەردوو باریشدا كورد سوپاسگوزارە.
فڕەنسا نموونەیەكی زیندووە، مەبەستمە بڵێم فڕەنسا ژیرانە مامەڵە دەكات و سیاسییانە دەیەوێ هێواش هێواش خۆی بخزێنێتەوە ناو كایە سیاسییە جیهانییەكان، لە داڕشتنەوەی سیستمی سیاسیی سەدە رۆڵی كاریگەری هەبێ، بەتایبەت لە ڕۆژهەڵاتی ناوەڕاست. بۆ ئامانجەكەیشی پێویستی بە هەموو لایەك هەیە. فڕەنسا كە یەكێكە لە وڵاتە كاریگەر و خاوەن هێزەكانی دنیا، كورد دەبێ باش بزانێ كە رۆڵی كاریگەری هەیە لە هەر بارێك كە بیەوێ بە كامە لایدا بخات، چونكە دەستی یەكەمی هەبووە لە دابەشكردنی خاكی كوردان (سایكس بیكۆ)، ئەمە ئەم ژەهرە بوو دەرخواردی كوردی دا و زیاتر لە 100 ساڵە پێیەوە دەناڵێنێ.
هەر سەرانی فڕەنسا بوون بە هەمانشێوە ڕۆڵی گەورەیان بینیوە لە بەرگریكردن لە كورد، وەك هێڵی دژەفڕین لە 1991 و پاراستنی كورد بە بڕیاری 688ی نەتەوە یەكگرتووەكان لە ژێر دەستی حكوومەتی سەدام حوسێن. دەرگاكردنەوە و شكانی گه‌مارۆی سەر هەرێمی كوردستان دوای ڕێفراندۆم كە هەموو دەرگا دیپلۆماسییەكانی دنیا بەسەر هەرێمدا داخرابوون.
ئەوەی جێی ئومێد و هیوای سیاسییانەیە بۆ هەرێم و گرنگە كاری زیاتری لەسەر بكرێت، سەرۆكی فڕەنسا ئیمانیۆل ماكرۆن بەشێوەیەكی دیار و ڕوون هەنگاو دەنێ كە هاوكاری هەرێمی كوردستان بكات، بەشێوەیەك قەرەبووی ئەم ستەمەی سەدە بكاتەوە كە لە كورد كرا، وەك لە چەند شوێنێكیش باس دەكرێ هاوڕیەتی و نزیكبوونەوەیەكی كەسی هەیە لە نێوان سەرۆكی هەرێم دۆزی كورد و سه‌رۆكایه‌تیی فڕەنسادا، بۆیە هەردوو هەنگاو باش و دڵخۆشكەرن بۆ كورد، هەم ماكرۆن دەیەوێ ڕەوتێكی گرنگ بۆ خۆی و وڵاتەكەی دروست بكات، هەژموونی خۆی لە عێراق و ناوچەكە زیاتر بكات، هەمیش پێوەندییەكەی لەگەڵ كوردستان دەتوانێ ببێتە هۆكاری زیادكردنی بەرژەوەندییەكانی فڕەنسا یان ترس لە ناوچەكە و عێراق، یەكلا بووەتەوە كە مایەی ترس یان پاراستنی بەرژەوەندییەكانی ئەم وڵاتە، خاڵێكی گرنگ و پێویستە، ئەمە بنچینەی سیاسەتی دەرەوەی هەر هەرێم و دەوڵەتێكە.
داهاتوو زیاتر بۆمان ڕوون دەكاتەوە كە ئایا كورد توانیویەتی هەموو ئەو هەنگاو و خۆنزیككردنەوە و هاوكارییانه‌ی فڕەنسا بەكار بێنێت بۆ ئامانجە گەورەكە و گەیشتن بە مافە ڕەواكانی، یان نەیارانی كورد ئەم بەڕەیەش لەژێرپێی كورد دەردەكەن بە هاوكاریی بەشێك لە كورد خۆی؟